O‘zbekiston va Germaniya davlat boshqaruvi sohasida hamkorlik qilmoqda
Davlat boshqaruvi tizimining zamonaviy muammolariga bag‘ishlangan xalqaro ilmiy-amaliy konferensiya o‘tkazildi.
Kecha O‘zbekiston Respublikasi Prezidenti huzuridagi Davlat boshqaruvi akademiyasida “Davlat boshqaruvi tizimining zamonaviy muammolari va rivojlantirishning ustuvor vazifalari” mavzusida xalqaro ilmiy-amaliy konferensiya bo‘lib o‘tdi.
Ushbu nufuzli anjumanda Davlat boshqaruvi akademiyasi xodimlari va tadqiqotchilari, Respublikamizning vazirlik-idora hamda Akademiyaning xalqaro hamkor tashkilot rahbarlari, soha ekspertlari, olimlar, hamda tadqiqotchilar ishtirok etdi.
Alohida ta’kidlab o‘tish joizki, 200 ga yaqin qatnashchilar ishtirok etgan mazkur anjuman soha mutaxassislarini bir joyga jamlagani bilan ahamiyatlidir.
Ushbu xalqaro konferensiyada J. Abdurahmonov nomidagi Qirg‘iziston Respublikasi Prezidenti huzuridagi Davlat boshqaruvi akademiyasi rektori Almazbek Akmataliyev, Koreya Bosh Vaziri huzuridagi Davlat boshqaruvi instituti Prezidenti Sangxan Chve, Ostona Davlat xizmati xabi boshqaruv raisi Alixan Baymenovlar onlayn tarzda ishtirok etib bugungi kun davlat boshqaruvi tizimining zamonaviy muammolari hamda bu borada O‘zbekiston bilan hamkorlikdagi aloqalar to‘g‘risida ma’ruza qildi.
Shuningdek tadbirda, Rossiya Federatsiyasi Prezidenti huzuridagi Rossiya xalq xo‘jaligi va Davlat xizmati akademiyasi prorektori Andrey Margolin so‘zga chiqib, davlat hokimiyati organlari, xo‘jalik boshqaruvi organlari va nodavlat notijorat tashkilotlarining boshqaruv kadrlaridan talab etiladigan zamonaviy kompetensiyalar to‘g‘risida so‘z yuritdi.
Xans Zaydel jamg‘armasining O‘zbekistondagi vakolatxonasi rahbari Javhar Do‘stov yig‘ilganlarga O‘zbekiston va Germaniya o‘rtasida davlat boshqaruvi sohasidagi hamkorlik to‘g‘risida atroflicha ma’lumot berdi.
Konferensiyada Davlat boshqaruvi tizimini rivojlantirish evolyusiyasi va nazariyasi, jamoaviy siyosiy liderlik, O‘zbekistonda ijtimoiy sohada davlat boshqaruvini tashkil etish masalalari, raqamli iqtisodiyot sharoitida davlat boshqaruvi tizimini rivojlantirish amaliyoti va boshqa mavzularda seksiya muhokamalari tashkil etildi.
Konferensiya so‘nggida mutaxassislar tomonidan bildirilgan takliflar va tavsiyalar bugungi kunda O‘zbekistonning davlat boshqaruvi tizimini takomillashtirishga hissa qo‘shishi ta’kidlandi.
