Toshkentda o‘quvchining tok urib vafot etishi ortidan maktab “zamdirektori” qamoqqa olindi
Maktab direktori o‘rinbosariga nisbatan jinoyat ishi ochildi.
Toshkentdagi maktabda 8-sinf o‘quvchisi tok urib vafot etishi yuzasidan mazkur maktab direktori o‘rinbosari qamoqqa olindi.
Joriy yilning 27 noyabr kuni Mirzo Ulug‘bek tumani, 99-sonli umumtaʼlim maktabi 8-sinf o‘quvchisi maktab hovlisida sport maydonidan chiqib ketayotgan vaqtida boshi bilan yiqilib, og‘zi ko‘pirib, biroz titrab so‘ng xushidan ketgan. Ekspertiza xulosasiga ko‘ra, bolaning o‘limi elektr jarohati, elektr toki yoyidan zaharlanish, o‘tkir nafas yurak-qon tomir yetishmovchiligi, bosh miya va o‘pka shishi, chap qo‘l kaft sohasi elektr tamg‘asi natijasida yuz bergan.
Prokuratura xabariga ko‘ra, maktabning xo‘jalik ishlari bo‘yicha direktor o‘rinbosariga JKning 207-moddasi (mansabga sovuqqonlik bilan qarash) 3-qismi “a” bandi va boshqa moddalari bilan ayblov eʼlon qilinib, “qamoqqa olish” tarzidagi ehtiyot chorasi qo‘llanilgan.
