Farg‘onada “apteka” mudiri psixotrop moddalar sotayotgan vaqtda ushlandi
Shuningdek, Buxoro va Navoiyda ham dorixona sotuvchilari kuchli taʼsir qiluvchi dorilarni shifokor retseptisiz berayotganda qo‘lga olindi.
Farg‘ona viloyatining Qo‘qon shahridagi “R.” MCHJga qarashli dorixona mudiri M.I. xaridorga tarkibida kuchli taʼsir qiluvchi moddalari mavjud bo‘lgan uch xil turdagi 138 dona dori vositasini sotgan vaqtida ushlandi. Dorixonadan jami 1293 dona dori vositasi ashyoviy dalil sifatida olindi.
Shuningdek, Bosh prokuratura huzuridagi Departament tomonidan Navoiy viloyatining Navoiy shahridagi “K.M.” xususiy korxonasiga qarashli dorixona sotuvchisi D.N. xaridorga 50 dona “Reduksin” nomli kuchli taʼsir qiluvchi dori vositasini shifokor retseptisiz sotgan vaqtida ashyoviy dalillar bilan ushlandi. Bundan tashqari, Buxoro viloyatining Jondor tumanidagi “F.M.” MCHJga qarashli dorixona sotuvchisi F.I. hech qanday hujjatsiz to‘rt dona “Gabanerv” nomli kuchli taʼsir qiluvchi dori vositasini fuqaro M.Sh.ga sotgan vaqtida ushlandi. Dorixonadan jami 198 dona kuchli taʼsir qiluvchi dori vositasi ashyoviy dalil sifatida olindi.
Holatlar yuzasidan Jinoyat kodeksining 251-1-moddasi — kuchli taʼsir qiluvchi yoki zaharli moddalarni qonunga xilof ravishda muomalaga kiritish hamda 186-3-moddasi — tarkibida kuchli taʼsir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish bilan jinoyat ishlari qo‘zg‘atilib, hozirda tergov ishlari olib borilmoqda.
