Yaponiyadagi zilzilada ikki kishi halok bo‘ldi
Mutaxassislarga ko‘ra, keyingi hafta ham yer silkinishi yuz berishi kutilmoqda.
Yaponiyada kuzatilgan kuchli yer silkinishlari oqibatida ikki kishi halok bo‘ldi. Ularning jasadi vayronalarni tozalash vaqtida topilgan.
Eslatib o‘tamiz, bugun mamlakatning markaziy qismida turli magnitudali 30 ta zilzila ro‘y berdi. Eng kuchlisining magnitudasi 7,6 ni tashkil etdi.
Yaponiyaning butun g‘arbiy qirg‘oqlari sunami xavfidan ogohlantirilgan. Mahalliy aholi zudlik bilan qirg‘oqbo‘yi hududini tark etishga yoki binolar tomiga chiqishga chaqirilmoqda.
Mamlakat g‘arbidagi bir qancha shaharlarda yirik yong‘inlar o‘chirilmoqda. Tog‘li hududlarda ko‘chkilar sodir bo‘lgan. Mutaxassislarning aytishicha, keyingi haftada ham zilzilalar davom etadi.
