Toshkentda O‘zbekiston va Ozarbayjon Birinchi xonimlari uchrashuvi bo'lib o'tdi
Ziroat Mirziyoyeva va Mehribon Aliyeva Islom sivilizatsiyasi markazidagi tarixiy ekspozitsiyalar, jumladan, Usmon Mushafi bilan tanishdi.
Toshkent shahrida O‘zbekiston Birinchi xonimi Ziroat Mirziyoyeva va Ozarbayjon Birinchi xonimi Mehribon Aliyevaning uchrashuvi bo‘lib o‘tdi.
Qo‘shma dastur doirasida Birinchi xonimlar Islom sivilizatsiyasi markaziga tashrif buyurib, uning ekspozitsiyalari bilan tanishdilar.
Tashrif davomida Ziroat Mirziyoyeva va Mehribon Aliyeva “Islomgacha bo‘lgan sivilizatsiyalar” zali, Birinchi va Ikkinchi Renessans davrlariga bag‘ishlangan ekspozitsiyalar hamda “Yangi O‘zbekiston” zalini ko‘zdan kechirdilar. Shuningdek, O‘zbekiston va Ozarbayjon xalqlari o‘rtasidagi ko‘p asrlik tarixiy va madaniy aloqalarni aks ettiruvchi muzey eksponatlari bilan tanishdilar.
Birinchi xonimlar tashrif yakunida markazning ma’naviy va me’moriy markazi hisoblangan “Qur’on zali”ga ham kirib, undagi noyob tarixiy yodgorliklar bilan tanishdilar.
Zalning eng qimmatli eksponatlaridan biri — Usmon Mushafi bo‘lib, VII asrga oid mazkur qo‘lyozma Qur’onning bizgacha yetib kelgan eng qadimiy nusxalaridan biri hisoblanadi. Noyob islom yozma madaniyati yodgorligi UNESCOning “Jahon xotirasi” xalqaro reyestriga kiritilgan.
Samimiy suhbat davomida O‘zbekiston va Ozarbayjon o‘rtasidagi gumanitar va madaniy aloqalarni yanada rivojlantirish masalalari muhokama qilindi.
Ikki mamlakat xalqlarini mushtarak tarix, boy madaniy meros, an’analar va ma’naviy qadriyatlar chambarchas bog‘lab turishi alohida ta’kidlandi.
