Ortiqcha vaznga ega aholi 50 foizga kamaytiriladi
Bu “Aholi salomatligi — 2030” strategiyasida ko‘zda tutilgan.
“Aholi salomatligi — 2030” strategiyasi loyihasiga ko‘ra, aholi orasida to‘g‘ri ovqatlanish va sog‘lom turmush tarzini shakllantirish orqali ortiqcha vaznga ega aholi ulushini 50 foizga va semizligi mavjud aholi ulushini 23 foizga qadar kamaytirish mo‘ljallangan.
Maktabgacha va maktab taʼlim tizimida sog‘lom ovqatlanish taʼminlanadi. Bunda bolalar va yoshlar o‘rtasida semizlik 30 foizga qisqartiriladi.
Har bir insonning o‘z salomatligiga masʼulligini oshirish nazarda tutilyapti. Preventiv tibbiyotni fundamental rivojlantirish, taʼlim tizimidan boshlab valeologiya asoslarini singdirish ham rejalashtirilgan.
Aholi orasida zararli odatlarga qarshi kurashish, tamaki chekuvchilar ulushini 10 foizga kamaytirish mo‘ljallanmoqda.
Bundan tashqari, O‘zbekiston aholisi orasida xalqaro qabul qilingan standart metodologiya asosida keng ko‘lamli tadqiqotlar o‘tkaziladi.
