Moldova klubi Ronalduni sotib olmoqchi
Jamoa ijtimoiy tarmoqdagi sahifasida maxsus bayonatni e’lon qildi.
Moldovaning “Dachiya” klubi “Al-Nasr” hujumchisi Krishtianu Ronalduni o‘z safiga qo‘shib olish uchun taklif bilan murojaat qildi.
“Ronalduning “Al-Nasr” bilan shartnomasini uzaytirmagani va qishki transfer oynasida erkin agentga aylanishi biz uchun imkoniyatdir. Uning futbolchilik faoliyatini davom ettirishi uchun eng yaxshi tanlov bizning klubimiz deb hisoblaymiz, bunga bir nechta sabab bor. Birinchidan, u boshqa ranglarga o‘rganish shart emas, biz ham sariq va ko‘k ranglarda o‘ynaymiz. Ikkinchidan, faoliyatini yakunlagach, unga klub administratsiyasida xalqaro elchi yoki bolalar guruhlarida murabbiylik lavozimini taklif qilamiz. Krishtianu, seni kutamiz”, deyiladi jamoaning ijtimoiy tarmoqlarda e’lon qilingan bayonotida.
Ma’lumot uchun, Ronaldu “Al-Nasr”da 2023-yildan beri o'ynab kelmoqda. Ushbu davr mobaynida futbolchi 59 ta o‘yinda maydonga tushdi va shuncha bor raqiblar darvozasiga to‘p kiritdi.
