Arteta shogirdlari final ostonasidan qaytishdi

 

"Nyukasl" va "Arsenal" Angliya liga kubogining final yo'llanmasi uchun kurash olib bordi. Birinchi o'yin (yarim final ikki o'yindan iborat) bir oy oldin bo'lib o'tgan. 7-yanvar kuni London klubi o'z stadionida mag'lub bo'lgandi (0:2). Bu natija “Nyukasl”ning keyingi bosqichga chiqish imkoniyatini sezilarli darajada oshirdi. Ammo, Arteta shogirdlari o'tgan dam olish kuni "Siti" darvozasiga beshta gol urdi, shuning uchun muxlislar jamoasining muvaffaqiyatiga ishonishgandi.

 

Mezbonlarga javob o‘yinida gol urish uchun bor-yo‘g‘i to‘rt daqiqa kifoya qildi. Hammasi “Arsenal” darvozaboni David Rayaning noaniq zarbasi va Aleksandr Isakning darvozaning yuqori burchagiga mohirona zarbasi bilan yakunlandi. "Nyukasl" keyinchalik yana tezkor qarshi hujum uyushtirdi. Biroq, ajoyib harakatlardan so'ng urilgan gol hakamning qarori bilan bekor qilindi. Uchrashuv hakami Saymon Xuper holatni ofsayd deb topdi.

 

“Arsenal” bunga o‘z imkoniyati darajasida javob qaytardi. Vaziyatlarning birida Martin Odegorning zarbasi darvoza ustuniga tegib qaytdi. "Nyukasl" asosan qarshi hujumlarga urg'u qaratdi. Jamoada Gordon-Isak dueti juda faol ishladi. Birinchi bo'lim davomida mehmonlarning muammolari yana bittaga ko'paydi. Gabriel Martinelli maydonga yiqilib, sonining orqa qismini changallab oldi. Mikel Arteta tanaffusga qadar uni almashtirishga majbur bo'lib, Ethan Nvanerini maydonga tushirdi. Avvalroq, Bukayo Saka taxminan mart oyiga qadar, Gabriel Jezus esa mavsum oxirigacha safdan chiqqan edi. Yaxshiyamki, "Arsenal" allaqachon Angliya kubogidan chiqib ketdi. Premyer-liga doirasida o'tadigan "Lester"ga qarshi navbatdagi o'yingacha hali biroz vaqt bor.

 

Ikkinchi bo'lim mehmonlarning faolligi bilan boshlandi. Uilyam Saliba tezkor harakatlarni amalga oshirdi. Biroq, "Nyukasl" himoyada tartibli o'ynadi. Arteta shogirdlar qanchalik oldinga intilmasin, ular kutgan natijaga erishish imkonsizdek tuyuldi. Balki, jamoa "Manchester Siti"ga qarshi ajoyib g'alabaga ortiqcha kuch sarflab yuborgan bo'lishi ham mumkin. Liga kubogining javob o'yinida mehmonlar hech narsa qila olishmadi. Ular himoyada xatoga yo'l qo'yishdi va hujumda deyarli xavfli vaziyatlarni vujudga keltirisha olmadi. "Arsenal" 12 ta burchak to'pini amalga oshirdi, ammo hech biridan unumli foydalana olmadi. Jamoa futbolchilarining deyarli barchasi odatdagi darajasidan past o'ynashdi.

 

"Nyukasl" haqli ravishda Liga kubogi finaliga chiqdi. Bu mavsumda jamoa Angliyaning top-klublari uchun dahshatli tush bo'ldi. Klub kubok uchun "Liverpul" yoki "Tottenhem" bilan kurash olib boradi. Final mart oyining o'rtalarida bo'lib o'tadi. “Nyukasl” 1955-yildan beri (Angliya Kubogini qo‘lga kiritgan) buyon yirik ichki musobaqalarda g‘alaba qozona olmagan.