Jennifer Lopezning konserti Toshkentni ijodiy iqtisodiyot markaziga aylantirdi

7-avgust kuni Toshkent shahridagi “Bunyodkor” stadionida O‘zbekiston Madaniyat va san’atni rivojlantirish jamg‘armasi homiyligida jahonga mashhur san’atkor Jennifer Lopezning ulkan konserti muvaffaqiyatli o‘tkazildi. “Up All Night — LIVE IN 2025” gastrol safari doirasidagi ushbu tadbir Osiyoda tashkil etilgan eng yirik konsertlardan biri sifatida tarixda qoldi va Toshkentni nafaqat mamlakat poytaxti, balki mintaqaning madaniy markaziga aylantirdi.

 

Tadbir xalqaro miqyosda keng qiziqish uyg‘otib, chiptalarning 67 foizidan ortig‘i xorijliklar tomonidan sotib olindi. Xususan, Rossiyadan 8,945, Qozog‘istondan 2,495 nafar mehmon, shuningdek, AQSH va Yevropa davlatlaridan ko‘plab sayyohlar kelishdi. O‘zbekistonga jami 15,330 nafar sayyoh tashrifi qayd etildi. Konsert tashkilotida yuzdan ortiq mahalliy pudratchi kompaniyalar faol qatnashdi.

 

Tadbir poytaxt iqtisodiyotiga sezilarli ta’sir ko‘rsatib, yozgi sayyohlik mavsumining past kechayotgan davrida mehmonxonalar va restoranlar faoliyatini jonlantirdi. Masalan, 5-8 avgust kunlari Toshkentdagi mehmonxonalar yotoqxonalar bandligi bo‘yicha o‘tgan yilning shu davriga nisbatan 25,7 foizga oshdi.

 

Bunday yirik tadbirlar ijodiy iqtisodiyotning rivojlanishi, turizmni rag‘batlantirish, yangi ish o‘rinlarini yaratish va madaniy sohada bandlikni oshirish uchun muhim imkoniyatdir. Shuningdek, ular O‘zbekistonning jahon maydonidagi ijobiy imidjini mustahkamlashga xizmat qiladi.

 

Konsertni tashkil etishda Jennifer Lopez jamoasidan 90 dan ortiq mutaxassislar Toshkentda faoliyat olib bordi. Tadbir davomida stadion va atrof-muhit havodan dronlar orqali nazorat qilindi. Yo‘l-patrul xizmati zamonaviy avtomobillar bilan ta’minlanib, 8 ta tez tibbiy yordam brigadasi faoliyat ko‘rsatdi. Kirish joylariga yuz tanish tizimlari va xavfsizlik detektorlar o‘rnatildi. Shuningdek, 3,686 nafar huquq-tartibot xodimi va 300 nafar ko‘ngilli tadbir xavfsizligini ta’minladi.

 

Obodonlashtirish ishlari uchun jami 500 nafar ishchi jalb qilindi va konsertdan so‘ng maydon toza holatga keltirildi. 18 ta oziq-ovqat savdo nuqtasi sanitariya nazorati ostida ishladi, tomoshabinlar uchun maxsus avtobuslar tashkil etildi va barcha zarur ma’lumotlar ommaviy axborot vositalari orqali oldindan yetkazildi.

 

Jennifer Lopezning Toshkentdagi konserti O‘zbekistonning xalqaro darajadagi tadbirlarni yuqori texnik standartlar va tomoshabinlar uchun qulay sharoitlar yaratgan holda o'tkazishga tayyorligini namoyish etdi. Madaniyat va san’atni rivojlantirish jamg‘armasining bunday tashabbuslari yurtimizni Markaziy Osiyoning zamonaviy va ijodkor markaziga aylantirishda muhim rol o‘ynaydi.