Toshkentda halok bo‘lgan YPX inspektorining oilasi davlat muhofazasiga olinadi
Mirobod tumanida xizmat vazifasini bajarayotgan YPX xodimi yuqori tezlikda harakatlangan transport vositasi tomonidan urib yuborilgan edi.
Toshkent shahar Ichki ishlar bosh boshqarmasi Yo‘l-patrul xizmati inspektori, kichik serjant Hosilbek Eshnazarovning vafoti yuzasidan rasmiy bayonot eʼlon qilindi. Unda marhum xodimning oila aʼzolari davlat muhofazasiga olinishi maʼlum qilindi.
Hosilbek Eshnazarov 2022-yildan buyon ichki ishlar organlarida xizmat qilib kelgan. Dastlab Yashnobod tumanida faoliyat boshlagan, 2024-yildan patrul-post xizmatida ishlagan. 2025-yildan esa Toshkent shahar Ichki ishlar bosh boshqarmasi Yo‘l-patrul xizmati inspektori sifatida xizmatga safarbar etilgan.
Xizmat faoliyati davomida u huquqbuzarliklarning oldini olish, jamoat tartibini saqlash hamda harakat xavfsizligini taʼminlash borasida faol ishtirok etgan. Yuzlab yirik va ommaviy tadbirlarda jamoat xavfsizligini taʼminlashda qatnashgan.
Faoliyati davomida 1392 ta huquqbuzarlikni aniqlagan bo‘lib, shundan 324 tasi qo‘pol qoidabuzarlikni tashkil etadi. 14 nafar mast haydovchining harakatiga chek qo‘ygan. Shuningdek, qarama-qarshi yo‘nalishda harakatlanish, hujjatsiz transport vositasini boshqarish hamda svetoforning taqiqlovchi ishorasiga bo‘ysunmaslik bilan bog‘liq 52 ta holatni aniqlab, qonuniy choralar ko‘rilishini taʼminlagan.
Joriy yil 25-fevral kuni tungi xizmat vaqtida Mirobod tumani Nukus ko‘chasida BVM rusumli avtomashinani olib qochib, yuqori tezlikda harakatlangan voyaga yetmagan shaxs tomonidan urib yuborilgan. Oqibatda Hosilbek Eshnazarov og‘ir tan jarohatlari olib, vafot etgan. Marhum 33 yoshda bo‘lib, ikki qiz va bir o‘g‘ilning otasi edi.
Mazkur holat yuzasidan O‘zbekiston Respublikasi Jinoyat kodeksining 104-moddasi 3-qismi “d” bandi hamda 267-moddasi 1-qismi bilan jinoyat ishi qo‘zg‘atilib, gumonlanuvchi protsessual tartibda qamoqqa olingan. Tergov harakatlari davom etmoqda.
Rasmiy bayonotda taʼkidlanishicha, xizmat burchini bajarish chog‘ida halok bo‘lgan xodimning oila aʼzolari davlat tomonidan har tomonlama qo‘llab-quvvatlanadi va qonunchilikda belgilangan tartibda ijtimoiy himoya choralari ko‘riladi.
