Eron AQSh bilan muzokara o‘tkazishni rad etgani fonida neft narxlari ko‘tarildi

Eron va AQSh-Isroil o‘rtasidagi mojaro fonida neft narxlari keskin oshmoqda. Bu haqda Al Jazeera xabar bermoqda.

 

Qayd etilishicha, xalqaro etalon bo‘lgan Brent markali neftning fyucherslari deyarli 2 foizga ko‘tarilib, bir barrel uchun 104 dollardan oshdi.

 

Bunga Eron Tashqi ishlar vaziri Abbos Aroqchi davlat televideniyesiga bergan intervyusida Tehron hozircha AQSh bilan to‘g‘ridan-to‘g‘ri muzokara olib bormayotganini ma’lum qilgani sabab bo‘ldi. 

 

Avvalroq AQSH prezidenti Donald Tramp AQSH va Eron Yaqin Sharqda to‘liq va umumiy nizolarni hal etish bo‘yicha muzokaralar o‘tkazganini ma'lum qilganidan so'ng Brent markali neft 13 foizga tushib, 96 dollarni tashkil qilgan edi.

 

Shu bilan birga, Oq uy matbuot kotibi Kerolayn Levitt Eronni harbiy mag‘lubiyatni qabul qilmasa, yanada qattiqroq zarba bilan ogohlantirdi.

 

Biroq Abbos Aroqchi Eronga muzokara taklif etilayotgani AQShning mag‘lubiyatni tan olganidan darak berishini bildirgan.

 

Mojaro natijasida Ho‘rmuz bo‘g‘ozi deyarli yopildi, natijada global neft yetkazib berishining beshdan bir qismini ta’minlaydigan yo‘l cheklandi. Energiya narxlari so‘nggi haftalarda 40 foizdan oshdi, ko‘plab mamlakatlar yonilg‘i taqsimoti va energiya tejash choralarini joriy etdi.

 

Maritime razvedka firmasi Windward ma’lumotlariga ko‘ra, mojaro boshlanishidan oldin bo‘g‘ozdan kundalik 120 ta kema o‘tgan bo‘lsa, seshanba kuni atigi 4 kema tranzit qilgan. Bozor kuzatuvchilari kemalar bo‘g‘ozdan erkin o‘tishini ta’minlaguncha narxlar oshishda davom etishini aytmoqda.

 

Osiyo fond bozorlari ham pasayish bilan ochildi: Yaponiya Nikkei 225, Janubiy Koreya KOSPI va Gonkong Hang Seng indeksi zarar ko‘rdi.