O‘zbekiston Venesuelani penaltilar seriyasida mag‘lub etdi
Shu tariqa jamoa FIFA Series g‘olibiga aylandi.
Bugun, 30-mart kuni Toshkent shahridagi “Bunyodkor” stadionida O‘zbekiston va Venesuela o‘rtasida futbol bahsi bo‘lib o‘tdi.
Unda O‘zbekiston jamoasi Venesuelani penaltilar seriyasida mag‘lub etdi. Asosiy vaqt 0:0 hisobida tugadi. Undan keyingi penaltilar seriyasida beshala futbolchi zarbani aniq amalga oshirdi. Raqiblarning bitta zarbasini esa Abduvohid Neʼmatov qaytardi.
Shunday qilib, O‘zbekiston 5:4 hisobida zafar quchib, yana bir kichik turnir g‘olibiga aylandi. "FIFA Series-2026" turniri o‘z nihoyasiga yetdi.
Har ikki jamoa birinchi turda g‘alaba qozongani sababli, mazkur bellashuvda g‘alaba qozongan jamoa turnir golibi deb topildi. Musobaqa reglamentiga ko‘ra, o‘yinlar durang natija bilan yakunlansa, penaltilar seriyasi tashkil etilishi belgilangan.
