"Akamning shuncha yil yig‘gan obro‘siga putur yetkazdim"

Toshkent shahrining Yashnobod tumanida PPX xodimiga qo‘l ko‘targan mast haydovchi qilgan ishidan pushaymonligini bildirib, barchadan kechirim so‘radi. 

 

Avvalroq Toshkent shahrida mast holda avtomobil boshqarib, yo‘l-transport hodisasiga sabab bo‘lgan fuqaroning IIO xodimiga qarshilik ko‘rsatib qo‘l ko‘targani haqida xabar berilgandi. 

 

Mazkur voqeadan so‘ng PPX xodimiga qo‘l ko‘targan haydovchining ichki ishlar tizimida ishlovchi akasi voqeaga aralashishga uringani uchun ishdan olingan.

 

“Spirtli ichimlik iste’mol qilganim sababli gap talashdik. Keyin shu post-patrul xizmatlari xodimlari yetib kelib, o‘zaro janjallashib qoldik. Shundan so‘ng kayfda qo‘l ko‘tarib yubordim. Qilgan ishimdan mingdan ming afsusdaman, kechirishlaringizni so‘rayman. Barchadan uzr so‘rayman. Transport hodisasi sodir qilib qo‘yganimda, meni deb boshqalar jabr ko‘rishi mumkin edi. Akamning ham shuncha yil ishlab, yig‘gan obro‘siga putur yetkazib qo‘ydim. Hammasiga o‘sha spirtli ichimlik sababchi ekan. Bu hol boshqa qaytarilmaydi. Qilgan ishimdan pushaymonman”, degan Sherzod Pardayev.

 

Toshkent shahar IIBB ma’lumotiga ko‘ra, 30-mart kuni tungi vaqtda Yashnobod tumanida Malibu va Leapmotor rusumli avtomobillar ishtirokida to‘qnashuv yuz bergan. Voqea haqda Leapmotor haydovchisi xabar bergach, YPX hodimlari hodisa joyiga yetib kelgan.

 

 YPX xodimlari Malibu haydovchisini alkotester orqali tekshiruvdan o‘tkazmoqchi bo‘lganda haydovchi xodimlarga qarshilik ko‘rsatib ulardan birining yuziga ikki marta musht tushirgan.

 

Shundan so‘ng xodimlar o‘zlari va atrofdagilar xavfsizligini ta’minlash maqsadida maxsus vositalar qo‘llab, uni zararsizlantirgan.

 

Keyin esa haydovchiga nisbatan Jinoyat kodeksining 219-moddasi 2-qismi hamda 277-moddasi 3-qismi “g” bandi bilan jinoyat ishi qo‘zg‘atilib, qo‘lga olingan. Tergov davom etmoqda.