Eldor Shomurodovning ustozi Italiya jamoasi bosh murabbiyligi uchun asosiy nomzodlardan biri sifatida ko‘rilmoqda
Ranerining Rim klubidagi samarali faoliyati va katta murabbiylik tajribasi jamoa bosh murabbiyligi uchun asosiy nomzodlar qatorida ko‘rilishiga asos bo‘lmoqda.
Jahon chempionati yo‘llanmasini qo‘ldan chiqargan Italiya terma jamoasining murabbiylar shtabida o‘zgarishlar amalga oshirildi, deb xabar bermoqda RomaPress — futbolga ixtisoslashgan mustaqil axborot portali.
Qizig‘i shundaki, 74 yoshli Klaudio Raneri 2025-yil yozida Italiya terma jamoasini boshqarish taklifini qabul qilmagan edi. O‘sha vaqtda u “Roma”da katta maslahatchi sifatida ishlayotgandi. 2026-yil aprel oyida mutaxassis Rim klubini tark etdi va hozirda hech qaysi jamoada faoliyat olib bormayapti.
“Italiya terma jamoasidan taklif tushganida rad javobini bergan edim, chunki o‘sha paytda ‘Roma’dagi vazifamni tark etishni istamagandim. Hozirda esa hech qanday majburiyatim yo‘q, shuning uchun bu variantni ko‘rib chiqish mumkin”, — dedi Klaudio Raneri Sky Sports’ga bergan izohida.
“Bilmayman. Agar sizni chaqirishsa, shunchaki ‘ha’ deb javob berish kifoya”, — dedi Klaudio Raneri.
Eslatib o‘tamiz, Klaudio Raneri o‘z faoliyati davomida “Yuventus”, “Inter”, “Roma” kabi Italiyaning yetakchi klublarini, shuningdek, Angliyaning “Lester Siti” jamoasini tarixiy chempionlikka olib chiqqan tajribali mutaxassis sifatida tanilgan. Uning boy tajribasi hozir og‘ir vaziyatga tushib qolgan Italiya terma jamoasi uchun muhim omil bo‘lishi mumkin.
Ma’lumot o‘rnida, Raneri 2024/25 mavsumda “Roma"da faoliyat olib borib, O‘zbekiston milliy terma jamoasi sardori Eldor Shomurodovga ham ustozlik qilgan. O‘sha mavsumda o‘zbekistonlik hujumchi 7 ta gol va 5 ta golli uzatmani amalga oshirib, samarali o‘yin ko‘rsatgan edi.
Abdullayeva Shaxrizoda
