Putin Xitoyga rasmiy tashrif bilan bordi

Vladimir Putin Xitoy Xalq Respublikasi raisining taklifiga binoan Pekinga rasmiy tashrifini boshladi. Tashrif Rossiya–Xitoy o‘rtasidagi do‘stona qo‘shnichilik, do‘stlik va hamkorlik to‘g‘risidagi shartnomaning 25 yilligi nishonlanayotgan davrga to‘g‘ri kelmoqda. Bu haqda RIA Novosti xabar berdi.

 

Ma’lum qilinishicha, Putinni aeroportda Xitoy Tashqi ishlar vaziri Van I kutib oldi. U Xitoy siyosiy tizimida rais Si Szinpindan keyin eng taniqli siyosatchilardan biri sifatida tilga olinadi.

 

Rasmiy ma’lumotlarga ko‘ra, tashrifning asosiy ish dasturi chorshanba, 20-may kuniga belgilangan. Dastur Rossiya delegatsiyasini Pekindagi markaziy maydonda tantanali kutib olish marosimi bilan boshlanadi.

 

Shundan so‘ng Xalq majlislari uyida Vladimir Putin va Si Szinpin o‘rtasida oliy darajadagi muzokaralar o‘tkaziladi.

 

Tomonlar keng qamrovli sheriklik va strategik hamkorlikni yanada mustahkamlashga doir qo‘shma bayonotni imzolashi kutilmoqda. Shuningdek, sanoat, savdo, transport, qurilish, atom energetikasi, ta’lim, kino sohasi hamda axborot agentliklari o‘rtasidagi hamkorlikni qamrab olgan qariyb 40 ta hujjat imzolanishi rejalashtirilgan.

 

Uchrashuv yakunida yetakchilar OAV uchun bayonot berishi kutilmoqda. Shu kuni kechqurun Putin va Si Szinpin ta’lim sohasidagi Rossiya–Xitoy hamkorligi yillarining ochilish marosimida ishtirok etadi.

 

Shuningdek, Putin Xitoy Davlat kengashi Bosh vaziri Li Syan bilan savdo-iqtisodiy masalalarni muhokama qiladi.

 

Tashrif dasturi Si Szinpin nomidan beriladigan rasmiy ziyofat va yetakchilar o‘rtasidagi norasmiy choy usti suhbat bilan yakunlanadi. Kreml ma’lumotiga ko‘ra, ushbu norasmiy uchrashuvda ikki davlat rahbarlari xalqaro kun tartibidagi dolzarb masalalarni muhokama qiladi.

Eslatib o‘tamiz, 13-15-may kunlari AQSH Prezidenti Donald Tramp ham Pekinga rasmiy tashrifini amalga oshirgan edi.