Saida Mirziyoyeva kichik biznes uchun soliq sharoitlari yengillashtirilgani haqida yozdi
Saida Mirziyoyeva buning samarasini, eng avvalo, oilaviy korxonalar, kafelar, do‘konlar, xizmat ko‘rsatuvchilar, mamlakat iqtisodiyotini harakatga keltirayotgan minglab insonlar his qilishini ta’kidladi.
26-may kuni Prezidentning “Kichik biznes subyektlarining o‘sishi uchun yanada kulay iqtisodiy va ma’muriy shart-sharoitlar yaratish to‘g‘risidagi” farmonni imzolandi.
Ushbu farmon bilan kichik biznes uchun soddalashtirilgan soliq rejimi chegarasi 1 milliard so‘mdan 5 milliard so‘mga oshirilishi belgilandi.
Mazkur yangilik haqida Prezident administratsiyasi rahbari Telegram-kanalida yozdi.
Saida Mirziyoyeva kichik biznes uchun yaratilayotgan yangi yengilliklar ishbilarmon doiralar tomonidan iliq kutib olinayotganini ta’kidladi. Unga ko‘ra, tadbirkorlar uzoq vaqtdan buyon QQS to‘lashga o‘tish uchun belgilangan 1 milliard so‘mlik chegara pastligi, soliq ma’muriyatchiligi murakkabligi, shuningdek, tekshiruv va hisobotlarning ko‘pligi yuzasidan murojaat qilib kelayotgan edi.
Qayd etilishicha, mazkur tartiblar ko‘plab tadbirkorlarni biznesni sun’iy ravishda bo‘lib yuritishga majbur qilgan.
“Buning samarasini, eng avvalo, oilaviy korxonalar, kafelar, do‘konlar, xizmat ko‘rsatuvchilar – bir so‘z bilan aytganda, o‘zining kundalik mehnati bilan mamlakatimiz iqtisodiyotini harakatga keltirayotgan minglab insonlar his qiladi”, — deya yozdi Mirziyoyeva.
