Rossiya va Xitoy uchun Hormuz bo‘g‘ozidan o‘tishda alohida sharoitlar saqlab qolinadi

Eron parlamentining Milliy xavfsizlik va tashqi siyosat qo‘mitasi rahbari Ibrohim Azizi Rossiya va Xitoy Hormuz bo‘g‘ozi orqali o‘tishda alohida yondashuv va qulay sharoitlardan foydalanishda davom etishini bildirdi. Bu haqda Ibrohim Azizi RIA Novosti agentligiga bergan intervyusida ma’lum qildi.

 

“Biz uchun strategik ahamiyatga ega davlatlar, jumladan Xitoy va Rossiya, bundan keyin ham Hormuz bo‘g‘ozi bilan bog‘liq masalalarda alohida yondashuv va qulay sharoitlardan foydalanadi”, — dedi Azizi.

 

Uning so‘zlariga ko‘ra, mazkur yondashuv savdo kemalari bilan bir qatorda neft tankerlariga ham tatbiq etiladi. Eron rasmiysi Rossiya va Xitoyni Tehronning eng yaqin hamkorlari sifatida tilga olib, bu davlatlar Eronni eng murakkab davrlarda ham qo‘llab-quvvatlab kelganini ta’kidladi.

 

Azizining qayd etishicha, Hormuz bo‘g‘ozi Eron uchun alohida geosiyosiy ahamiyatga ega. U bo‘g‘oz mamlakatning hududiy suvlari va geografik makonining bir qismi ekanini aytib, Tehron u bilan bog‘liq har qanday qarorni mustaqil ravishda qabul qilish huquqiga egaligini bildirgan.

 

Hormuz bo‘g‘ozi dunyodagi eng muhim neft tashish yo‘laklaridan biri hisoblanadi. Jahon bozoriga yetkazib berilayotgan neftning katta qismi aynan ushbu bo‘g‘oz orqali tashiladi.

 

RIA Novosti maqolasida qayd etilishicha, AQSH va Isroilning Eron Islom Respublikasiga qarshi harbiy operatsiyasidan so‘ng Tehron bo‘g‘oz akvatoriyasini yopgan. Natijada dunyoning ko‘plab mamlakatlarida yoqilg‘i va sanoat mahsulotlari narxlari oshgan.

 

Shu bilan birga, Hormuz bo‘g‘ozini qayta ochish masalasi AQSH va Eron o‘rtasida mojaroni yakunlashga qaratilgan ehtimoliy kelishuvning muhim bandlaridan biri sifatida muhokama qilinmoqda.