Prezident Ibrohim G‘afurov vafoti munosabati bilan hamdardlik bildirdi

Prezident Shavkat Mirziyoyev milliy adabiyot va madaniyat rivojiga ulkan hissa qo‘shgan atoqli adabiyotshunos olim, adib, tarjimon va jamoat arbobi, O‘zbekiston Qahramoni Ibrohim G‘afurov vafoti munosabati bilan hamdardlik bildirdi.

 

1937-yil 27-dekabrda Toshkent shahrida tug‘ilgan Ibrohim G‘afurov Toshkent davlat universitetini (hozirgi O‘zbekiston Milliy universiteti) filolog mutaxassisligi bo‘yicha tamomlagan. Mehnat faoliyatini Davlat badiiy adabiyot nashriyotida muharrir sifatida boshlagan olim keyinchalik G‘afur G‘ulom nomidagi Adabiyot va san’at nashriyotida mas’ul lavozimlarda faoliyat yuritgan.

 

U uzoq yillar davomida “O‘zbekiston adabiyoti va san’ati” hamda “Milliy tiklanish” gazetalarida rahbarlik lavozimlarida ishladi, shuningdek, O‘zbekiston Milliy universiteti va O‘zbekiston davlat jahon tillari universitetida talabalarga saboq berdi.

 

Ibrohim G‘afurov siyosiy va jamoatchilik faoliyatida ham faol ishtirok etib, O‘zbekiston Milliy tiklanish demokratik partiyasi Markaziy kengashi raisi, Oliy Majlis deputati va parlamentning Matbuot va axborot qo‘mitasi raisi o‘rinbosari lavozimlarida ishlagan.

 

Adabiyotshunos olim o‘zbek adabiyotining dolzarb masalalariga bag‘ishlangan ko‘plab ilmiy maqola, kitob va risolalar muallifi sifatida tanilgan. U, shuningdek, Fyodor Dostoyevskiy, Ernest Xeminguey, Gabriel Garsia Markes, Jeyms Joys va Chingiz Aytmatov kabi jahon adabiyoti namoyandalarining asarlarini o‘zbek tiliga tarjima qilgan.

 

Ibrohim G‘afurovning ilm-fan, adabiyot va madaniyat rivojiga qo‘shgan hissasi davlat tomonidan yuksak baholanib, unga “O‘zbekiston Qahramoni” unvoni, “O‘zbekiston Respublikasi san’at arbobi” faxriy unvoni, shuningdek, “Do‘stlik” va “Mehnat shuhrati” ordenlari berilgan.

 

Hamdardlikda Ibrohim G‘afurovning yorqin xotirasi xalq qalbida hamisha saqlanib qolishi ta’kidlangan.