Yevroittifoq rossiyaliklar uchun Shengen vizasi tartibini kuchaytirmoqda
Yangi vizaviy cheklovlar 2027-yildan kuchga kirishi mumkin.
Yevropa Komissiyasi Rossiya fuqarolariga Shengen vizalarini berish tartibini yanada kuchaytirish bo‘yicha yangi choralarni ishlab chiqayotganini ma’lum qildi. Mazkur tashabbus Yevroittifoqning qator davlatlari tomonidan bildirilgan murojaatlardan so‘ng ilgari surilmoqda. Bu haqda Euronews xabar berdi.
Yevrokomissiyaning migratsiya masalalari bo‘yicha vakili Markus Lammertning bildirishicha, xavfsizlikka oid tahdidlarni hisobga olgan holda uchinchi davlatlarning dushmanona harakatlariga qarshi maqsadli vizaviy cheklovlar joriy etilishi rejalashtirilmoqda. Yangi qoidalar 2027-yildan kuchga kirishi mumkin.
Ayni paytda vizalar berish masalasi Yevroittifoqning alohida a’zo davlatlari vakolatiga kirishi sababli Rossiya fuqarolariga viza berishni to‘liq taqiqlash masalasi ko‘rib chiqilmayotgani qayd etilgan.
Avvalroq Shengen hududiga kiruvchi 11 davlat — Daniya, Islandiya, Latviya, Litva, Niderlandiya, Norvegiya, Polsha, Finlyandiya, Chexiya, Shvetsiya va Estoniya Yevropa Komissiyasiga qo‘shma murojaat yo‘llab, Rossiya fuqarolariga vizalar berish bo‘yicha yanada qat’iy va majburiy cheklovlar joriy etishni talab qilgan edi.
Murojaatda Yevroittifoq tavsiyalari turli mamlakatlarda turlicha qo‘llanayotgani, bu esa Rossiya fuqarolariga turistik va boshqa maqsadlarda vizalar berilishida sezilarli tafovutlarni keltirib chiqarayotgani ta’kidlangan.
Ma’lumotlarga ko‘ra, Fransiya, Italiya va Ispaniya Rossiya fuqarolariga turistik vizalar berishni davom ettirmoqda. 2025-yilda Fransiya qariyb 180 ming, Italiya 160 mingga yaqin va Ispaniya 100 mingga yaqin viza rasmiylashtirgan.
Shuningdek, murojaatda rossiyaliklarga ko‘p martalik vizalar berish tartibini yanada qat’iylashtirish hamda Ukrainadagi urushda qatnashgan amaldagi va sobiq harbiylarning Yevroittifoq hududiga kirishini cheklash takliflari ham ilgari surilgan.
