AQSh Eronning harbiy obyektlariga zarbalar berdi
Vashington Apache vertolyoti bilan bog‘liq hodisaga javoban yangi harbiy amaliyot o‘tkazdi.
AQSh va Eron o‘rtasidagi keskinlik yana kuchaydi. AQSh ma’muriyati Hormuz bo‘g‘ozi yaqinida AH-64 Apache vertolyoti bilan bog‘liq hodisadan so‘ng Eron hududidagi qator harbiy obyektlarga zarbalar berganini ma’lum qildi. Bu haqda Reuters xabar berdi.
AQSh prezidenti Donald Tramp ushbu harakatni Amerikaning harbiy yo‘qotishlariga javob sifatida izohlab, Vashington bunday hodisalarni javobsiz qoldirmasligini ta’kidlagan.
Ma’lumotlarga ko‘ra, zarbalar Eronning havo mudofaasi tizimlari, radar stansiyalari hamda uchuvchisiz apparatlarni boshqarish infratuzilmasiga qaratilgan. Xususan, Hormuz bo‘g‘ozi yaqinidagi bir qator harbiy obyektlar nishonga olingan.
Eron ommaviy axborot vositalari mamlakat janubidagi ayrim hududlarda portlashlar sodir bo‘lganini xabar qilgan. Tasnim agentligi ma’lumotiga ko‘ra, portlashlar Hormozgon viloyatidagi Sirik va Minab shaharlari, shuningdek, Qeshm oroli atrofida eshitilgan.
Eron Tashqi ishlar vaziri Abbos Aroqchi AQSh harakatlarini keskin qoralab, Tehron bunday hujumlarni javobsiz qoldirmasligini ma’lum qilgan. U ijtimoiy tarmoqlardagi bayonotida Eron qurolli kuchlari mamlakat xavfsizligiga qarshi qaratilgan har qanday tahdidga munosib javob qaytarishini ta’kidlagan.
Eslatib o'tamiz, Tramp Eron AQSH harbiy vertolyotini urib tushirganini ma’lum qilgan edi.
