AQSh va Eron o‘rtasidagi texnik muzokaralar davom etmoqda — Reuters
Vashington Tehronni memorandum shartlariga rioya qilmayotganlikda ayblamoqda.
AQSh va Eron o‘rtasidagi texnik darajadagi maslahatlashuvlar davom etmoqda. Bu haqda Reuters agentligi AQSh ma’muriyatidagi manbaga tayanib xabar berdi.
Agentlik ma’lumotlariga ko‘ra, Vashington Eron bilan mavjud ziddiyatlarni diplomatik yo‘l bilan hal etish tarafdori bo‘lib qolmoqda va shu maqsadda mutaxassislar darajasidagi muzokaralar davom ettirilmoqda.
Shu bilan birga, AQSh ma’muriyati Tehron o‘zaro anglashuv memorandumi doirasida zimmasiga olgan ayrim majburiyatlarni to‘liq bajarmayotganini ta’kidlamoqda. Xususan, Vashington Eron kuchlarining Hormuz bo‘g‘ozida kemalarga o‘q uzishini memorandum shartlariga zid harakat sifatida baholagan.
Eslatib o‘tamiz, AQSh va Isroil joriy yil 28-fevral kuni Eronga qarshi harbiy amaliyotlarni boshlagan edi. Oradan bir necha oy o‘tib, tomonlar Livanni ham qamrab olgan barcha yo‘nalishlarda harbiy harakatlarni to‘xtatishni nazarda tutuvchi o‘zaro anglashuv memorandumini imzolagan.
Mazkur hujjatni amalga oshirish yuzasidan Qatar va Pokiston vositachiligida Shveytsariyaning Byurgenstok shahrida AQSh hamda Eron vakillari o‘rtasida muzokaralar o‘tkazilgan. Muzokaralarning birinchi bosqichi yakunida tomonlar texnik maslahatlashuvlarni davom ettirish va kelgusidagi muloqot uchun zarur asos yaratilganini ma’lum qilgan edi.
Biroq 8-iyul kuni AQSh Eronni Hormuz bo‘g‘ozi bo‘yicha erishilgan kelishuvlarni buzganlikda ayblab, uning hududidagi bir qator obyektlarga zarbalar bergan. Reuters manbasiga ko‘ra, harbiy keskinlik saqlanib qolayotganiga qaramay, Vashington diplomatik muloqotni davom ettirish niyatidan voz kechmagan.
