YPX motosikllari bilan to‘qnashgan Onix haydovchisi vafot etdi
Hodisa oqibatida patrul motosiklini boshqarib kelgan YPX xodimi voqea joyida vafot etgan edi.
Toshkent shahrida Onix rusumli avtomobil va YPX inspektorlarining patrul motosikllari ishtirokida sodir bo‘lgan yo‘l-transport hodisasi oqibatida qurbonlar soni ikki nafarga yetdi.
Ma’lum qilinishicha, hodisadan so‘ng shifoxonaga ikki nafar patrul motosiklida bo‘lgan YPX xodimi, bir nafar YPX inspektori hamda Onix avtomobili haydovchisi olib kelingan. 27-iyul kuni Onix haydovchisi shifoxonada vafot etgan.
Qolgan uch nafar jabrlanuvchining ahvoli yaxshilangani va ular umumiy bo‘limga o‘tkazilgani bildirilgan.
Eslatib o‘tamiz, mazkur yo‘l-transport hodisasi 2026-yil 16-iyul kuni soat 18:30 atrofida poytaxtning Do‘rmon yo‘li ko‘chasida sodir bo‘lgan. Uch nafar YPX inspektori patrul motosikllarida xizmat vazifasini bajarayotgan vaqtda G‘azalkent ko‘chasidan chorrahaga kirib kelgan Onix avtomobili bilan to‘qnashuv yuz bergan.
Hodisa oqibatida patrul motosiklini boshqarib kelgan bir nafar YPX xodimi voqea joyida olgan tan jarohatlari sabab vafot etgan edi.
Avvalroq ijtimoiy tarmoqlarda ushbu YTH kortej kuzatuvi vaqtida sodir bo‘lgani haqida taxminlar tarqalgan. Biroq Yo‘l harakati xavfsizligi xizmati bu ma’lumotlarni asossiz deb baholab, fuqarolarni tasdiqlanmagan axborotlarni tarqatmaslikka chaqirgan.
Ayni paytda mazkur hodisa yuzasidan tergovga qadar surishtiruv ishlari davom ettirilmoqda.
