Toshkentda Onix va YPX motosikllari to‘qnashdi: YPX xodimi vafot etdi
Poytaxtdagi YTH bo‘yicha IIV rasmiy ma’lumot berdi
Toshkent shahrida patrul xizmati motosikllari va yengil avtomobil ishtirokida sodir bo‘lgan yo‘l-transport hodisasi oqibatida bir nafar Yo‘l-patrul xizmati (YPX) xodimi halok bo‘ldi. Bu haqda IIV Yo‘l harakati xavfsizligi xizmati matbuot kotibi Zoyir Yo‘ldoshev ma’lum qildi.
Qayd etilishicha, hodisa 16-iyul kuni soat taxminan 18:30 da poytaxtning “Do‘rmon yo‘li” ko‘chasida sodir bo‘lgan. Uch nafar YPX inspektori patrul motosikllarida xizmat vazifasini bajarayotgan vaqtda “G‘azalkent” ko‘chasidan chorrahaga kirib kelgan Onix rusumli avtomobil bilan to‘qnashgan.
Yo‘l-transport hodisasi oqibatida patrul motosiklini boshqarib kelgan bir nafar YPX xodimi olgan tan jarohatlari sabab voqea joyida vafot etgan. Tan jarohati olgan boshqa fuqarolarga tibbiy yordam ko‘rsatilmoqda.
IIV Yo‘l harakati xavfsizligi xizmati ijtimoiy tarmoqlarda mazkur hodisa kortej kuzatuvi vaqtida sodir bo‘lgani haqidagi xabarlar haqiqatga to‘g‘ri kelmasligini bildirib, asossiz ma’lumotlarni tarqatmaslikka chaqirdi.
Hozirda hodisa yuzasidan tergovga qadar tekshiruv harakatlari olib borilmoqda.
