Rossiya Ukrainaga yirik raketa va dron hujumi uyushtirdi
Kiyev va boshqa shaharlarda portlar, energetika va sanoat obyektlari, shuningdek, yirik savdo kompaniyalarining logistika markazlari nishonga olingan.
Rossiya 27-avgustga o‘tar kechasi Ukraina hududiga raketa va dronlar bilan yirik hujum uyushtirdi. Bu haqda Reuters xabar berdi.
Ukraina harbiylari hujum vaqtida 258 ta dron va ballistik raketalar qo‘llanganini ma’lum qildi. Havo mudofaasi kuchlari yettita ballistik raketani urib tushirgan.
Kiyevda havo hujumi bir necha soat davom etgan. Dronlar qoldiqlari oqibatida to‘rt kishi jarohatlangan. Xarkiv shahridagi savdo markaziga berilgan zarba oqibatida esa bir kishi halok bo‘lgan, ikki kishi jarohatlangan.
Hujumlar Kiyev viloyatidagi COMFY kompaniyasining tarqatish markaziga ham zarar yetkazgan. O‘yinchoqlar ishlab chiqaruvchi kompaniyaning yana bir logistika markazi vayron qilingan. “Roshen” kompaniyasi esa Kiyev yaqinidagi omborlaridan biri yo‘q qilinganini bildirgan.
Rossiya Mudofaa vazirligi zarbalar Krivoy Rog va Zaporojjyadagi metallurgiya korxonalari, Poltava viloyatidagi neftni qayta ishlash zavodi, Kiyev atrofidagi logistika markazlari hamda Odesa viloyatidagi uchta portga berilganini ma’lum qildi. Hujumlar oqibatida Ukrainaning bir nechta hududlarida poyezdlar qatnovi kechikdi.
Bundan tashqari, oltita Rossiya droni Moldova havo hududiga kirgan. Ulardan biri Moldova hududidan topilgan. Prezident Mayya Sandu hodisani qoraladi.
Rossiya esa Ukraina tomonidan Britaniya qurollaridan foydalanib Rossiya hududiga berilgan zarbalarga javoban Buyuk Britaniyaning Ukraina ichidagi va tashqarisidagi harbiy obyektlariga zarba berishi mumkinligidan ogohlantirdi.
Avvalroq Ukraina Rossiyadagi Ozon logistika markazlariga zarba bergan edi.
