Sietl va Vashingtondan keyin Oregon ham 1-sentyabrni “O‘zbekiston Mustaqilligi kuni” deb e’lon qildi

 

AQShning Oregon shtati gubernatori Tina Kotek 2026-yil 1-sentabrni shtat miqyosida “O‘zbekiston Mustaqilligi kuni” deb rasman e’lon qildi.

 

O‘zbekistonning Sietldagi Bosh konsulxonasi ma’lumotiga ko‘ra, gubernator tomonidan imzolangan va Oregon davlat kotibi Tobias Rid tomonidan tasdiqlangan proklamatsiyada shtat aholisi ushbu muhim sanani birgalikda nishonlashga chaqirilgan.

 

Mazkur qaror O‘zbekiston davlat mustaqilligining 35 yilligi munosabati bilan qabul qilingan. Proklamatsiyada O‘zbekistonning mustaqillik yillarida suverenitetini mustahkamlab, boy madaniy merosini asrab-avaylash, tinchlik, farovonlik va milliy taraqqiyot yo‘lida izchil rivojlanib kelayotgani qayd etilgan.

 

Hujjatda O‘zbekistonda amalga oshirilayotgan iqtisodiy va ijtimoiy islohotlar, mamlakatning xalqaro maydondagi faolligi hamda Markaziy Osiyoda mintaqaviy hamkorlikni rivojlantirish borasidagi sa’y-harakatlariga ham e’tibor qaratilgan.

 

Shuningdek, O‘zbekiston va AQSh o‘rtasidagi aloqalar savdo, investitsiyalar, texnologiyalar, ta’lim, toza energetika, turizm va xalqlararo almashinuvlar kabi yo‘nalishlarda tobora kengayib borayotgani e’tirof etilgan.

 

Proklamatsiyada O‘zbekiston Respublikasining Sietldagi Bosh konsulxonasi Oregon shtatiga ham konsullik xizmatlarini ko‘rsatishi, O‘zbekiston va Oregon o‘rtasidagi madaniy, iqtisodiy, ta’lim hamda xalqlararo aloqalarni rivojlantirishga hissa qo‘shayotgani alohida qayd etilgan.

 

Oregon shtati O‘zbekiston bilan madaniy, ta’lim, iqtisodiy va xalqlararo munosabatlarni yanada kengaytirishni qo‘llab-quvvatlashi, o‘zbek-amerika hamjamiyati hamda ikki xalq o‘rtasidagi do‘stlik va o‘zaro anglashuvni mustahkamlashga hissa qo‘shayotgan fuqarolarning faoliyati e’tirof etilgan.

 

Oregonning mazkur qarori O‘zbekiston Mustaqilligi kunining AQSh shtati miqyosida rasman e’tirof etilgani bilan ahamiyatlidir. Bu O‘zbekiston–AQSh munosabatlari nafaqat federal, balki shtatlar darajasida ham izchil rivojlanib borayotganining yana bir ifodasidir.

 

Ma’lumot uchun, Oregon AQShning Tinch okeani sohilida joylashgan iqtisodiy va texnologik jihatdan muhim shtatlaridan biridir. Aholisi 4,3 millionga yaqin bo‘lgan shtat iqtisodiyoti 340 milliard dollardan oshadi. Oregon yarimo‘tkazgichlar va yuqori texnologiyalar sohasidagi yirik markazlardan biri bo‘lib, bu yerda Intel kompaniyasining yirik ilmiy-ishlab chiqarish majmuasi joylashgan. Shtat, shuningdek, umumiy savdo solig‘i mavjud bo‘lmagan AQShning besh shtatidan biridir.

 

Eslatib o'tamiz, avvalroq Vashington va Sietl shaharlarida ham 1-sentabr “O‘zbekiston Mustaqilligi kuni” deb rasman e’lon qilingan edi.