Toshkent metrosida poyezdlar harakati intervallari qisqartiriladi
Mazkur chora yangi o‘quv yili boshlanishi bilan kutilayotgan yo‘lovchilar oqimini samarali boshqarish uchun amalga oshiriladi.
Yangi o‘quv yili boshlanishi munosabati bilan Toshkent metropolitenida yo‘lovchilar oqimi ortishiga tayyorgarlik ko‘rilmoqda. Bu haqda “Toshkent metropoliteni” AJ xabar berdi.
Poytaxtdagi oliy ta’lim muassasalarida o‘quv mashg‘ulotlarining birinchi smenasi soat 08:00 dan boshlanishi belgilangan.
Shu munosabat bilan ertalabki va kechki tig‘iz vaqtlarda metropolitenning barcha yo‘nalishlarida poyezdlar harakati intervallari qisqartiriladi. Xususan:
- Chilonzor yo‘nalishida — 1,5–2 daqiqagacha;
- O‘zbekiston yo‘nalishida — 3 daqiqagacha;
- Yunusobod yo‘nalishida — 4 daqiqagacha;
- Yer usti halqa yo‘li yo‘nalishida — 7–8 daqiqagacha.
Ma’lum qilinishicha, 2026-yil davomida Toshkent metropoliteni vagon parki 14 ta zamonaviy harakat tarkibi bilan to‘ldirilishi rejalashtirilgan. Hozirgacha ularning 11 tasi yetkazib berilgan, yana 3 ta harakat tarkibi yaqin kunlarda olib kelinishi kutilmoqda.
Shuningdek, yo‘lovchilar oqimini samarali boshqarish va bekatlarda xavfsizlikni ta’minlash maqsadida tig‘iz vaqtlarda barcha 50 ta metro bekatida navbatchilik tizimi yo‘lga qo‘yilgan.
Mas’ul xodimlardan iborat guruhlar ertalabki va kechki tig‘iz vaqtlarda bekatlarda navbatchilik qilib, yo‘lovchilarga zarur ko‘mak ko‘rsatadi.
Mazkur choralar yangi o‘quv yili boshlanishi bilan kutilayotgan yo‘lovchilar oqimini samarali boshqarish, metro qatnovining barqarorligini ta’minlash hamda yo‘lovchilarga qulay va xavfsiz xizmat ko‘rsatishga qaratilgan.
