“Xalqqa pul qanday sarflanayotgani haqida hisobot kerak”: Alisher Qodirov Agentlikka javob qaytardi

 

“Milliy tiklanish” demokratik partiyasi raisi Alisher Qodirov Madaniy meros agentligining avvalgi bayonotiga javob berdi.

 

Avvalroq Qodirov Toshkentdagi ayrim tarixiy binolarni, jumladan, “rus rassomining uyi” sifatida tilga olgan obyektni davlat tomonidan muhofaza qilish masalasiga e’tiroz bildirgan edi. Shundan so‘ng Madaniy meros agentligi Toshkent shahri, Bobur ko‘chasi, 7-uydagi bino yuzasidan rasmiy munosabat bildirib, obyektning tarixiy va madaniy qiymatini izohlagan. Agentlik madaniy merosni “o‘zimizniki” va “begonaniki”ga ajratish noto‘g‘ri ekanini ta’kidlagan edi.

 

Qodirov esa o‘zining Telegram kanalidagi munosabatida Agentlik Oliy Majlis Qonunchilik palatasidagi byudjet hisoboti vaqtida deputatlarning savollariga javob berish o‘rniga ijtimoiy tarmoqlarda bayonot berganini aytdi.

 

Uning ta’kidlashicha, “Milliy tiklanish” partiyasi Agentlikka bergan savollariga javob olish uchun parlament so‘rovi yoki eshituv vakolatidan foydalanishga harakat qiladi.

 

Qodirov, xususan, Sarmishsoy, Shohizinda va Mizdakxon kabi madaniy meros obyektlari bo‘yicha ilgari bildirilgan tanqid va takliflarga javob berilmaganini ta’kidlagan.

 

Deputat Sarmishsoy hududida katta mablag‘ sarflanganiga qaramay, ayrim ochiq hududlar qarovsiz qolayotgani haqida savol qo‘ygan. Shuningdek, Shohizinda yaqinidan o‘tuvchi avtomobil yo‘li yodgorlikka zarar yetkazayotgani va bu masalada tegishli choralar ko‘rilayotgan-ko‘rilmayotganini so‘ragan.

 

Bundan tashqari, Qodirov Buxoroda qadimiy Qur’on nusxalaridan biri saqlanayotgan joy, shuningdek, Dovon davlati bilan bog‘liq arxeologik meros hududlaridan foydalanish masalalarini ham ko‘targan.

 

Deputat Agentlikning madaniy meros obyektlariga ajratilayotgan mablag‘lardan foydalanishi va ularning muhofazasi bo‘yicha faoliyatiga doir boshqa savollar ham borligini bildirgan.

 

“Xalqqa esa uning qadriyatlari va ming yillik merosini asrash uchun berayotgan pullarini qanday ishlatilayotgani haqida hisobot kerak, provokatsion munosabatlaringiz emas”, deya yozgan Qodirov.

 

U, shuningdek, bu fikrlar deputat sifatidagi shaxsiy pozitsiyasi ekanini, partiya raisi sifatida esa Agentlikning hisoboti ortidan parlamentda so‘z olishini ma’lum qilgan.

 

Madaniy meros agentligi esa avvalgi munosabatida Bobur ko‘chasi, 7-uydagi bino 1935-yilda qurilgani, uning tarixi me’mor Aleksey Shchusev, shuningdek, akademiklar Toshmuhammad Qori-Niyoziy va Vasiliy Shishkin kabi ilm-fan vakillari faoliyati bilan bog‘liqligini bildirgan. Agentlik ma’lumotiga ko‘ra, bino 2020-yilda Milliy ro‘yxatga kiritilgan va 2021-yilda uni ro‘yxatdan chiqarish taklifi rad etilgan.