Prezident Shavkat Mirziyoyev Imom Buxoriy maqbarasini ziyorat qildi
Prezidentga majmuani rivojlantirish, ziyorat turizmini kengaytirish va allomaning ilmiy merosini dunyoga targ‘ib qilish ishlari haqida axborot berildi.
An’anaga ko‘ra, Prezident Shavkat Mirziyoyev Samarqandga tashrifini Imom Buxoriy yodgorlik majmuasini ziyorat qilishdan boshladi. Qur’on oyatlari o‘qilib, duolar qilindi.
Tashrif chog‘ida davlat rahbariga majmuadan samarali foydalanish, uning turistik salohiyatini yanada oshirish, Imom Buxoriyning boy ilmiy merosini asrab-avaylash, o‘rganish va dunyoga targ‘ib etish orqali islom ma’rifati va ziyorat turizmini rivojlantirish bo‘yicha berilgan topshiriqlar ijrosi yuzasidan axborot berildi.
Mamlakat yetakchisi bu ishlarni izchil davom ettirish zarurligini ta’kidladi.
“Bu ulug‘ zot bizga butun ilmlarini, bilimlarini meros qilib qoldirganlar. Biz shu ilmlarni davom ettirsak, hech qachon kam bo‘lmaymiz. Men o‘zim ham har safar ulug‘ bobomizni ziyorat qilganimda, xalqimiz hayotiga baraka bersin, biri ikki bo‘lsin deb duo qilaman. Biz ulug‘larimiz merosini asrash va targ‘ib qilish yo‘lida hali ko‘p ishlar qilamiz. Butun dunyodan odamlar O‘zbekistonga kelib, Islom sivilizatsiyasi markazini, Imom Buxoriy majmuasini ko‘rishi, ziyorat qilishi uchun sharoit yaratamiz”, – dedi davlat rahbari.
Prezident tashabbusi bilan yangidan bunyod etilgan majmua islom olamining muqaddas qadamjolaridan biri sifatida doim mahalliy va xorijlik ziyoratchilar bilan gavjum. Kompleks avval bir kunda 12 ming ziyoratchiga xizmat ko‘rsatgan bo‘lsa, hozir bu raqam 65 mingdan ortiqni tashkil etadi.
Majmua tarkibidagi 10 ming kishilik masjid, ulkan maqbara, har birining balandligi 75 metr bo‘lgan to‘rt minora, moviy gumbazlar inshootga o‘zgacha ulug‘vorlik baxsh etib turibdi. Ilg‘or axborot texnologiyalari asosida tashkil etilgan innovatsion muzeyda muqaddas dinimiz tarixi, payg‘ambarlar hayoti, Imom Buxoriyning muhaddislik faoliyati keng yoritilgan, noyob eksponatlar namoyish etilmoqda.
Ayni paytda majmuada ziyoratchilar uchun har tomonlama qulay sharoit, xalqaro standartlarga mos servis yo‘lga qo‘yildi. Ziyoratgoh hududida 20 dan ortiq zamonaviy mehmonxonalar faoliyat ko‘rsatmoqda.
