2022-yil 24-iyun kuni Toshkent shahrida SHHTga aʼzo davlatlar energetika vazirlarining ikkinchi yig‘ilishi bo‘lib o‘tadi. Bu haqda tashqi ishlar vazirligi rasmiy vakili maʼlumot berdi.
Unda O‘zbekiston, Hindiston, Pokiston, Rossiya, Xitoy, Tojikiston, Qirg‘iziston va Qozog‘iston energetika vazirliklari rahbarlari ishtirok etadi.
Yig‘ilish yakunida SHHTning energetika yo‘nalishida konseptual hujjatlari tasdiqlanishi kutilmoqda. Xususan, SHHTga aʼzo davlatlarning Energetika sohasidagi hamkorligi konsepsiyasini amalga oshirish bo‘yicha Chora-tadbirlar rejasi hamda O‘zbekiston tashabbusi bilan ishlab chiqilgan SHHTga aʼzo davlatlarning Qayta tiklanadigan energiya manbalaridan foydalanish sohasidagi hamkorligi dasturi loyihasi shular jumlasidandir.
Bundan tashqari, SHHTga aʼzo davlatlar delegatsiyalari rahbarlari O‘zbekiston energetika forumida ishtirok etadi.
Avvalroq SHHT Arab davlatlari ligasi bilan hamkorlikni kengaytirishi to‘g‘risida xabar berilgandi.