Андижонда 3 та туман ИИБ бошлиғи ўринбосари ишдан олинди
Шунингдек, фуқароларнинг муаммоларига етарли эътибор қаратмаган бир гуруҳ сектор раҳбарлари қатъий огоҳлантирилди.
Ўзбекистон Республикаси Президенти маслаҳатчиси Бахтиёр Исламов ҳамда Ички ишлар вазири Пўлат Бобожонов, республика ҳарбий прокурори Шуҳрат Узоқовлар бошчилигидаги идоралараро республика ишчи гуруҳи бир ҳафта давомида Андижон вилоятининг туман-шаҳарларида бўлиб, инсон қадри учун амалга оширилаётган ислоҳотларни натижадорлиги манзилли ўрганилди ва таҳлил қилинди. Бу ҳақда ИИВ ахборот хизмати хабар берди.
Қайд этилишича, ўрганиш ишлари якунида Андижон вилояти ҳокимлиги мажлислар залида вилоят ҳамда туман-шаҳар сектор раҳбарлари, корхона ва ташкилотларнинг бошлиқлари ҳамда бошқа масъуллар иштирокида танқидий-таҳлилий йиғилиш бўлиб ўтган.
Унда Ўзбекистон Республикаси Президенти маслаҳатчиси Бахтиёр Исламов томонидан вилоятда аҳоли мурожаатлари билан ишлаш аҳволи қониқарли даражада эмаслиги қаттиқ танқид остига олинган. Жумладан, жорий йил бошидан шу кунга қадар жисмоний ва юридик шахслар томонидан 50 мингта мурожаат келиб тушган бўлиб, шундан 24 фоизи ижобий ҳал этилган бўлса, қолган 72 фоизига эса мутасаддилар томонидан тўғри тушунтириш билан чекланилган, холос.
Вилоятдаги бир қатор туман-шаҳарларда режада белгиланиб олинган сайёр қабуллар ўтказилмаганлиги, ҳуқуқий тарғибот ишларини етарли даражада ташкил этилмаганлиги, ёшларнинг бўш вақтларини самарали ташкил этишга қаратилган ишларнинг суст ташкил этилганлиги танқидий таҳлил қилинган. Вилоятда коррупсия ҳолатига йўл қўйиб берилиши, унинг олдини олишга қаратилган кечиктириб бўлмайдиган ишларнинг ташкил этилиши қониқарли деб топилиб алоҳида таъкидланган.
Ишчи гуруҳ аъзоларининг ўрганиш натижаларига кўра фуқароларнинг муаммоларига етарли эътибор қаратмаган, уларни ҳал этишга суст муносабатда бўлган бир қатор туман-шаҳарларнинг сектор раҳбарлари қатъий огоҳлантирилган.
Бундан ташқари, жойларда содир этилаётган жиноятларнинг муҳокама йиғилишлари талаб даражасида ташкил этилмаётганлиги, олдини олиш мумкин бўлган жиноятларнинг барвақт олдини олишга қаратилган ишлар суст ташкил этилганлиги танқидий муҳокама қилинган ва юқоридаги каби ҳолатларга йўл қўйган бир қатор шаҳар-туман ИИБ бошлиқларига огоҳлантиришлар берилган. Андижон, Олтинкўл ҳамда Булоқбоши туманлари ИИБ бошлиқларининг биринчи ўринбосарлари лавозимидан озод этилган. Бир қатор камчиликларга йўл қўйган ИИО ходимларига ҳайфсан интизомий жазоси қўлланилган.
Аниқланган камчиликларни тез фурсатда бартараф этиш бўйича мутасаддиларга топшириқлар берилиб, уларнинг масъулияти оширилган.
