Ўзбекистонда “Зўравонликка қарши 16 кун” ижтимоий-маърифий тадбирлари бошланди
Аёлларни ҳимоя қилиш, реабилитация ва ҳуқуқий қўллаб-қувватлаш бўйича мавжуд хизматлар журналистларга таништирилди.
Бугун аёлларга нисбатан тазйиқ ва зўравонликнинг олдини олиш бўйича мамлакатда амалга оширилаётган ишлар юзасидан журналистлар ва блогерлар учун пресс-тур ташкил этилди.
Маълумки, 25 ноябрь — Хотин-қизларга нисбатан зўравонликка барҳам бериш халқаро куни. Ушбу сана 1999 йилда БМТ Бош Ассамблеяси томонидан аёлларга қарши тазйиқларга эътиборни кучайтириш ва профилактика чораларини самарали ташкил этиш мақсадида таъсис этилган.
Шу муносабат билан Ўзбекистонда “Зўравонликка қарши 16 кун” ижтимоий-маърифий тадбирлари бошланди. Ижтимоий ҳимоя миллий агентлиги ва Аёлларни реабилитация қилиш ва мослаштириш Республика маркази томонидан пресс-тур давомида мавжуд тизимлар таништирилди.
Марказларда аёл ва қизларга касб-ҳунар ўргатиш йўлга қўйилган бўлиб, ҳозирда IT, пишириқчилик, чеварчилик, болалар массажи, аёллар сартарошлиги каби йўналишларда ўқитиш амалга оширилмоқда. Иштирокчиларга тадбиркорлик ва молиявий саводхонлик бўйича ҳам қўшимча кўникмалар берилмоқда.
Зўравонликдан жабрланганларни қўллаб-қувватлаш мақсадида бирламчи кўмак хоналари ташкил этилган. Бу ерда аёллар ва уларнинг вояга етмаган фарзандларига шошилинч тиббий, психологик, ҳуқуқий ва ижтимоий хизматлар кўрсатилади. Агар чуқур реабилитация зарур бўлса, улар тегишли марказларга йўналтирилади.
Шунингдек, ижтимоий хизматлар тўлиқ рақамлаштирилгани қайд этилди. Янги электрон модул орқали ҳимоя ордерлари ва жабрланувчилар ҳақидаги маълумотлар "Инсон" марказларига реал вақт режимида етказилмоқда. Бу тизим ёрдамга муҳтожларни тезкор аниқлаш ва зарур хизматларни ўз вақтида кўрсатиш имконини бермоқда.
