ФВВ ходимига 30 минг доллар пора таклиф қилган тадбиркор қўлга олинди
Фавқулодда вазиятлар вазири ФВВ инспекторини тадбиркордан пора олмагани учун пул мукофоти билан тақдирлади
Давлат хавфсизлик хизматининг Замон.уз га маълум қилишича, пойтахтда фаолият юритувчи тадбиркор ўзи раҳбарлик қиладиган МЧЖ томонидан Яккасарой туманида барпо этилган, лекин, бир қатор камчиликлари бартараф этилмаган 12 қаватли турар жой мажмуасини фойдаланишга қабул қилиниши бўйича “Nazorat.MS.UZ” электрон портали орқали тақдим этадиган аризасини ижобий ҳал қилиб бериши эвазига Тошкент шаҳар Фавқулодда вазиятлар бош бошқармаси ходимига 30 минг АҚШ доллари миқдорида пора таклиф этган.
Ходим ҳолат бўйича масъулларни хабардор қилган ва ўтказилган тезкор тадбирда МЧЖ раҳбари пойтахт ФВББ ходимига ушбу пул маблағини берган вақтида ашёвий далиллар билан қўлга олинган.
Ҳолат юзасидан тадбиркорга нисбатан Жиноят Кодексининг 211-моддаси (пора бериш) 3-қисми “а” банди билан жиноят иши қўзғатилиб, “қамоқ” эҳтиёт чораси қўлланилди. Ҳозирда тергов ҳаракатлари олиб борилмоқда.
Фавқулодда вазиятлар вазирлиги ахборот хизматининг маълум қилишича, генерал-майор Азизбек Икрoмов тадбиркордан пора олмагани учун ФВВ инспекторини пул мукофоти билан тақдирлади.
