Байден Украинадаги урушнинг олдини олиши мумкин эди — Global Times
Шунингдек, муаммонинг ечими НАТО қўлида эканлиги маълум қилинди.
Хитойнинг Global Times нашри АҚШни Украинадаги низо учун жавобгар сифатида баҳолади.
“Украина низосида Вашингтон алоҳида жавобгар томон ҳисобланади.
АҚШ бошчилигидаги НАТО унинг ҳал этилиши калитини ушлаб турибди. АҚШ Конгерсси вакиллар палатаси собиқ аъзоси Тулси Габбард ‘Байден Украина НАТО аъзоси бўлмаслиги кафолатини берса, Россия билан урушнинг олди олинади’ деганди.
Унинг сўзлари айни ҳақиқат эди. Аммо АҚШнинг асосий ОАВлари атайин буни инкор қилибгина қолмай, украин халқининг фожеасидан фойдаланди”, – дейилади нашрда эълон қилинган мақолада.
Шу билан бирга муаллифлар Вашингтон "жамоатчилик фикри билан уруш олиб боришни тўхтатиши лозим"лигини қайд этган.
"Украина масаласида мураккаб тарихи ва амалий факторлар мавжудлиги инобатга олинса, ушбу муаммони соддалаштириш ғаразли, ҳатто ёвуз мақсадларни кўзлайди. Россия ва Украинада музокара олиб бориш учун маълум ниятлар борлиги инобатга олиниши муҳим. Сиёсий-дипломатик ечим ҳали ҳам мавжуд”, – дея таъкидланган.
Мақола сўнггида Вашингтон беқарорлик манбаси бўлишдан кўра,можаро ҳал этилишида алоҳида жавобгарликни зиммасига олиши кераклиги айтилган.
Маълумот ўрнида: 24 февраль куни Россия Украина шарқида махсус операция бошлашини эълон қилди. Ҳозирда мамлакатнинг турли нуқталарида жанглар кетмоқда. Ғарб бунга жавобан Москвага санкциялар жорий этди. Қора рўйхатда Путин, РФ ташқи ишлар вазири Сергей Лавров ва бошқа кўплаб олий мартабали амалдорлар ҳам бор.
Эслатиб ўтамиз, аввалроқ РФ-Украина музокаралари тўғрисида маълумот берилганди.
