“Бир мамлакатда, бир вақтда, бир масофада, бир мақсадда – бирга югурамиз!”
Ушбу шиор остида “Янги Нафас” оммавий югуриш мусобақасига старт берилади.
Мамлакатимиз мустақиллигининг 32 йиллигига бағишлаб, 3 сентябрь куни эрта тонгда Республика бўйлаб (16 та шаҳар) оммавий югуриш мусобақаси бошланади.
Бугун бир қатор ташкилотлар вакиллари ҳамда оммавий ахборот воситалари иштирокида ушбу йирик тадбирни юқори савияда ўтказишга бағишланган матбуот анжумани ўтказилди.
Анжуман давомида мусобақанинг маршрутлари, югурувчилар старт олиш нуқтаси ва бошқа ташкилий масалалар бўйича маълумотлар эълон қилинди.
Шунингдек, якунда аҳоли ўртасида оммавий спортни оммалаштириш ва соғлом турмуш тарзини тарғиб қилиш мақсадида ҳудудларда “Янги Нафас” оммавий югуриш мусобақалари кетма-кет 3 йил давомида мутлақо бепул ўтказилаётгани таъкидланди. Бу аҳолининг барча қатламларини, пенсионерлардан тортиб уй бекалари ва тадбиркорларгача мусобақада иштирок этишга жалб қилиш имконини беради.
