Фарғонада прокурор ўринбосари пора билан қўлга тушди
Ҳозирда унга иккита модда билан жиноий иш очилган.
Фарғона вилояти Қўштепа тумани прокурор ўринбосари пора билан қўлга тушди. Бу ҳақда Бош прокуратура матбуот хизмати раҳбари Ҳаёт Шамсутдинов маълум қилди.
Қайд этилишича, 27 апрель куни соат 18:30 ларда Фарғона вилояти прокуратураси ДХХ вилоят бошқармаси ходимлари билан ҳамкорликда тадбир ўтказган.
Тадбирда Қўштепа тумани прокурор ўринбосари танишлари орқали суднинг иш юритувидаги жиноят иши бўйича айбдор шахсга нисбатан жазо қўлланилишида енгиллик қилиб беришни айтиб, алдов йўли билан ишончни суиистеъмол қилиб, келишилган 2 минг долларни олган вақтида ушланган.
Мазкур ҳолат юзасидан Жиноят кодексининг 168 (фирибгарлик) ва 28,211 (пора бериш) моддалари билан жиноят иши қўзғатилиб, гумонланувчи процессуал тартибда ушланган.
Ҳозирда тергов ҳаракатлари олиб борилмоқда.
