Ispaniyaning janubi-sharqiy qismida joylashgan Jumilla shahrida musulmonlarning Ramazon va Qurbon hayiti kabi diniy bayramlarda ommaviy tarzda birga namoz o‘qishlari rasman taqiqlanishi belgilandi. Bu haqda El Pais nashri xabar bermoqda.
Mazkur qaror munitsipalitetlarga tegishli umumiy foydalanishdagi jamoat joylaridan foydalanish qoidalarining o‘zgartirilgan yangi tartiblariga asoslangan. Jumilla ma’muriyati bu o‘zgarishlarni “jamoat tartibini saqlash va makonlardan maqsadli foydalanishni ta’minlash” bilan izohladi.
Jumillada hozirda 27 mingga yaqin aholi yashaydi, shundan 1 500 nafardan ortig‘i musulmonlardir. Asosan Shimoliy Afrikadan kelgan muhojirlar va ularning avlodlari hisoblanadi.
Ispaniya Konstitutsiyasining 16-moddasi fuqarolarga vijdon va diniy e’tiqod erkinligini kafolatlaydi. Shu bois bu qaror jamiyatda keng muhokamaga sabab bo‘lib, ayrim huquqshunoslar va inson huquqlari faollari bunday taqiqni diniy erkinlikka tajovuz sifatida baholamoqda.