Жанубий Корея прокуратураси собиқ президент Юн Сок Ёль учун ўлим жазосини сўради
Собиқ президент 2023 йилдан бошлаб ҳокимиятни қўлида ушлаб туриш учун махфий режа тузганликда айбланмоқда.
Жанубий Корея махсус прокуратураси собиқ президент Юн Сок Ёльга нисбатан 2024 йил декабрида киритилган фавқулодда ҳолат (martial law) бўйича тўнтариш режасини бошқаришда айбланиб, ўлим жазосини сўради. Бу ҳақда Reuters хабар бермоқда.
Сўнгги терговларга кўра, Юн ва собиқ мудофаа вазири Ким Ёнг-ҳюн 2023 йил октябридан бошлаб ҳокимиятни қўлида ушлаб туриш учун махфий режа тузганликда айбланмоқда.
Прокурорлар таъкидлашича, Юн “либерал демократияни ҳимоя қилиш” мақсадида фавқулодда ҳолат эълон қилганини иддао қилсада, унинг ҳаракати конституцияга зид бўлиб, Миллий Ассамблея ва Сайлов Комиссияси функцияларини издан чиқарган ҳамда либерал демократик тартибни бузган. Прокурорлар Юн жиноятни чин дилдан афсусланмаган ва халқдан тўғри кечирим сўрамаган деб ҳисобламоқда.
Собиқ президент 65 ёшда бўлиб, айбловларни рад этмоқда. Ёнҳап агентлигига берган баёнотида у фавқулодда ҳолатни “мамлакатни вайрон қилиши мумкин бўлган ёвузликдан ҳимоя қилиш” учун эълон қилганини маълум қилган. Юн, шунингдек, бу чорани президент ваколатлари доирасида қабул қилганини ва унинг мақсади ҳукумат ишларини тўсиб қўйган мухолиф партияларни огоҳлантириш бўлганини айтмоқда.
Суднинг якуний қарори 2026 йил февраль ойида қабул қилиниши кутилмоқда. Собиқ президентлар Чон Ду-хван ва Ро Те-У нинг 1995-1996 йилги ишларида ҳам прокурорлар ўлим жазосини сўраган бўлсада, апелляция судлари ҳукмларни юмшатган ва улар қисқа муддат қамоқда ўтириб, кейин президент томонидан авф олинган. Шу билан бирга, Жанубий Кореяда сўнгги ўлим жазосини бажариш 1997 йилдан бери амалга оширилмаган.
