ОАВ: Мадуро Трампдан истеъфога чиқиш эвазига 200 млн доллар сўради
Венесуэла президенти, шунингдек, ўз сафдошлари учун амнистия ва дўст мамлакатдан бошпана сўраган.
Хорижий оммавий ахборот воситалари хабарига кўра, Венесуэла президенти Николас Мадуро 21 ноябрь куни АҚШ президенти Доналд Трамп билан бўлган телефон мулоқотида ўзининг 200 миллион долларлик шахсий активларини сақлаб қолиш, шунингдек, сафдошлари учун амнистия ва дўст мамлакатдан бошпана тақдим этишни сўраган. Бу ҳақда The Telegraph нашри маълум қилди.
Нашр манбаларига кўра, томонлар Венесуэланинг кўплаб амалдорларига амнистия бериш масаласида келишувга эриша олмаган. Шунингдек, ўтиш даври ҳукуматини шакллантириш ва Мадуро учун қайси давлат бошпана таклиф қилиши борасида ҳам келишмовчиликка учраган.
Хабарда айтилишича, Трамп Венесуэла раҳбарига Хитой ёки Россияни бошпана сифатида кўриб чиқишни таклиф қилган. Мадуро эса Ғарбий ярим шарда қолиш тарафдори бўлган. Қатар икки томон учун эҳтимолий муроса варианти сифатида тилга олинган.
Реутерс агентлиги аввалроқ Трамп телефон мулоқотида Мадурони бир ҳафта ичида мамлакатни тарк этишга чақирганини хабар қилган эди. Мазкур муддат 28 ноябрда якунланган. Эртаси куни АҚШ раҳбари ижтимоий тармоқлардаги мурожаатида авиакомпаниялар ва учувчиларни Венесуэла ҳаво ҳудудини тўлиқ ёпиқ сифатида қабул қилишга чақирган.
Доналд Трамп ноябрь ойи охирида ушбу телефон суҳбати бўлиб ўтганини тасдиқлаган, бироқ тафсилотларни очиқламаган. Унинг таъкидлашича, Венесуэла ҳаво ҳудуди ҳақидаги баёнот АҚШ томонидан ҳарбий зарбалар берилиши мумкинлигининг аломати сифатида талқин қилинмаслиги керак.
