Yevropa Ittifoqi universitetlari olimlari o‘zaro hamkorlikda umrni uzaytiruvchi oziq-ovqat mahsulotlarini aniqlash maqsadida tadqiqot o‘tkazdi. Ular tadqiqot natijasida organizmni yoshartiruvchi va umrni uzaytirishga yordam beruvchi mahsulotlar ro‘yxatini tuzdi. Unga ko‘ra, «uzoq umr ko‘rish taomnoma»sidan quyidagi mahsulotlar o‘rin olgan:
Suli yormasi
Suli yormasidan tayyorlangan bo‘tqa nafaqat nonushtabop, balki salomatlik uchun ham foydali sanaladi. U, ayniqsa, yurak zaifligi, kamqonlik, ortiqcha vazn, oshqozon va o‘n ikki barmoqli ichak kasalliklarining oldini olishda yordam beradi.
Qaynatilgan tuxum
Tuxum jismoniy faollikni, aqliy quvvatni oshiradi, xotirani mustahkamlaydi. Lekin allergiyasi bor bemorlarga qaynatilgan tuxumni haftada ikki martadan ortiq yeyish tavsiya etilmaydi. Qovurilgani esa semirtirish xususiyatiga ega.
Sut mahsulotlari
Organizmni kalsiy bilan taʼminlab, ovqat hazm bo‘lishini yaxshilaydi va immunitetni mustahkamlaydi.
Brokkoli karami
Brokkoli va boshqa xochgulli sabzavotlar tarkibida sog‘lom hujayralarni himoya qilishga yordam beruvchi sulforafan va boshqa antioksidantlar mavjud.Ularni, ayniqsa, xom holda isteʼmol qilish foydali.
Rezavor mevalar
Rezavor mevalar ham organizmni himoya qiluvchi antioksidantlarga juda boy. Ular tarkibidagi antotsianlar miya va mushak to‘qimalarining to‘liq faoliyat ko‘rsatishiga yordam beradi.
Qora shokolad
Qoramtir shokolad tarkibida antioksidantlik xususiyatiga ega, tromblarni oldini olishga yordam beruvchi, yallig‘lanishga qarshi kurashuvchi flavonoid moddalari mavjud.
Pomidor
Pomidor eng kuchli karotinoid — inson qonida uchraydigan antioksidant hisoblanuvchi likopinning ajoyib manbasi sanaladi. U inson orgnizmini prostata, o‘pka va meʼda saratonidan himoya qilishda yordam beradi.
Ushbu mahsulotlar polifenol(mikroelementlar)ga boy bo‘lib, shikastlangan to‘qimlarni tiklaydi va ular hayotini uzaytiradi. Shuningdek, mutaxassislar baliq, go‘sht va sut mahsulotlari organizmni kerakli kaloriya, yog‘ va minerallar bilan taʼminlashi, mevalar to‘qimalarni asrashi hamda ular umrini uzaytirish xususiyatiga egaligini taʼkidlagan.
Ozoda Choriyeva tayyorladi.