Дунёдаги энг бадбўй ҳидли гул ўғирлаб кетилди

Германиянинг Ромбергпарк ботаника боғида ўсувчи ва дунёдаги энг бадбўй ҳидли гул сифатида танилган Титан Арум ўғирлаб кетилди. Ноёб ўсимликнинг илдиз қисми номаълум шахслар томонидан олиб кетилган.

 

Боғ маъмуриятининг маълум қилишича, ўғирланган гулнинг илдизи 20–30 килограмм атрофида бўлиб, у гуллаш арафасида эди. Ботаника боғининг одатий текширувлари чоғида гул йўқолганини пайқаб қолишган. Бу ҳодиса боғ учун катта йўқотиш ҳисобланади, чунки «Давид» 2016 йилдан бери коллекцияда сақланиб келган ва кейинги гуллашини кутишган.

 

Титан Арум ўзининг ўта кучли ва бадбўй ҳиди билан машҳур. Унинг ҳидини чириган гўшт ёки ёввойи ўсимликларнинг ачиган ҳидига қиёслашади. Бу ўсимлик табиатда Индонезия оролларида ўсади ва гуллаш даврида ҳашаротларни ўзига жалб қилиш учун ана шундай ҳид чиқаради.

 

Полиция ҳозирда тергов олиб бормоқда. Мутахассисларнинг айтишича, бундай гул жуда ноёб бўлиб, уни қайта етиштириш осон эмас. Шунингдек, у қора бозорда биологик коллекциялар ёки махсус коллекционерлар томонидан катта маблағ эвазига сотилиши мумкин.

 

Титан Арум гуллаши камдан-кам учрайди ва одатда бир неча йилда бир марта содир бўлади. Гуллаш жараёни атиги икки кун давом этади, шунинг учун у гуллаганда кўплаб ташриф буюрувчиларни жалб қилади.