Мисрда 70 та футбол майдонига тенг улкан музей очилди
У ерда 100 мингдан ортиқ археологик артефактлар намойишга қўйилган.
Мисрда сўнгги ўн йилликларда амалга оширилган энг йирик маданий лойиҳа — янги улкан музей ўз эшикларини очди. Музей Қоҳира шаҳри четида, Гиза эҳромлари яқинида жойлашган бўлиб, унинг умумий майдони 500 минг квадрат метрни ташкил этади. Бу ҳудуд тахминан 70 та стандарт футбол майдони билан тенглаштирилади.
Музейда Миср тарихининг етти минг йиллик даврини қамраб олган 100 мингдан ортиқ археологик артефактлар намойишга қўйилган. Экспозицияда фиръавнлар даври, юнон ва рим ҳукмронлиги ҳамда кейинги тарихий босқичларга оид ноёб ашёлар ўрин олган.
Доимий кўргазманинг энг муҳим қисми — Тутанхамон мақбарасидан топилган 5 000 дан ортиқ экспонатлар тўплами. Улар орасида фиръавнга тегишли машҳур олтин саркофаг ҳам бор. Мазкур ашёларнинг аксарияти илк бор омма эътиборига тўлиқ тарзда тақдим этилмоқда.
Музейнинг очилиши Мисрда туризмни ривожлантириш ва миллий меросни глобал миқёсда тарғиб қилишда муҳим воқеа сифатида баҳоланмоқда.
