Эйнштейннинг скрипкаси аукционда сотувга қўйилди

Буюк физик Алберт Эйнштейннинг ёшлигида ишлатган биринчи скрипкаси Буюк Британияда аукционда сотувга қўйилди. Мазкур ноёб мусиқа асбобининг бошланғич нархи 200 минг фунт стерлинг (тахминан 270 минг доллар) этиб белгиланган, якуний нарх эса 300 минг фунтгача (тахминан 405 минг доллар) етиши кутилмоқда.

 

Скрипка 1894 йилда немис устаси Антон Зунтерер томонидан тайёрланган. У Эйнштейнга ёшлигида совға қилинган бўлиб, физик уни “Лина” деб атаган. Маълумотларга кўра, бу скрипка Эйнштейннинг мусиқага бўлган муҳаббатини шакллантиришда муҳим роль ўйнаган.

 

Эйнштейн ҳаёти давомида мусиқани доимо ўзига илҳом манбайи деб билган. У бир суҳбатида шундай деган эди: “Агар мен физик бўлмаганимда, албатта мусиқачи бўлардим.” У кўпинча Мозарт ва Бачнинг асарларини ижро этган, мусиқани илмий фикрлашдаги уйғунликнинг ифодаси деб билган.

 

Мазкур скрипка Эйнштейн Германияда яшаган йилларда, нацистлар ҳокимиятга келганидан сўнг Швейтсарияга кўчганида яшириб қўйилган. Кейинчалик у физикка яқин дўсти Мах фон Лауэ орқали Маргарете Ҳоммрич исмли аёлга совға қилинган. Айнан шу оила уни ҳозиргача сақлаб келган ва энди тарихий артефактни аукцион орқали сотувга қўйган.

 

Аукцион уйи Dominic Winter Austioneers вакиллари маълум қилишича, скрипканинг сақланиш ҳолати жуда яхши ва у Эйнштейннинг шахсий ҳаёти ҳамда мусиқий истеъдодига оид камёб экспонат сифатида катта қизиқиш уйғотмоқда.