1-avgust kuni Pokiston poytaxti Islomobod shahrida Central Asia Tour – 2025 xalqaro motorrallisi start oldi. 16 nafar sayohatchidan iborat guruh “Islomobod–Peshovar” yo‘nalishi bo‘ylab safarini boshladi. Dasturga ko‘ra, ishtirokchilar 23 kun davomida Pokiston, Afg‘oniston, O‘zbekiston va Tojikiston hududidan o‘tuvchi 5000 kilometrdan ortiq masofani bosib o‘tadi. 14-avgust kuni ralli qatnashchilari Toshkentga yetib kelib, Pokistonning O‘zbekistondagi elchixonasida o‘tkazilgan Pokiston Milliy bayrami tadbirida ishtirok etishdi.
Pokiston 1947-yilning 14-avgustida mustaqillikka erishgan bo‘lib, bu sana har yili mamlakat bo‘ylab va xorijdagi elchixonalarda Davlat bayrog‘ini tantanali ko‘tarish marosimi bilan boshlanadi. An’anaga ko‘ra, bu yil ham asosiy tadbir poytaxt Islomobodda bo‘lib o‘tdi. Prezident va bosh vazir Parlament binosi oldida Milliy bayroqni ko‘tarib, hukumat yutuqlari hamda kelgusi rejalar haqida ma’lumot berishdi. Toshkentdagi marosimda ham prezident va bosh vazirning tabrigi o‘qib eshittirildi. Tadbirga Pokiston Milliy Assambleyasi a’zosi, Pokiston–O‘zbekiston do‘stlik jamiyati raisi Sayed Rafiulla, Central Asia Tour – 2025 rahbari Muhammad Mukarram va ralli ishtirokchilari qatnashdi.
Ralli rahbari Muhammad Mukarram so‘zida Pokiston haqida ko‘pchilikda noto‘g‘ri tasavvur mavjudligini, aslida mamlakatda turizm salohiyati juda katta ekanini ta’kidladi. U Afg‘oniston orqali O‘zbekistonga bemalol kelganlarini, yo‘llar xavfsizligini aytib, Termiz, Samarqand, Buxoro va Toshkentda bo‘lib, o‘zbek xalqining boy madaniyati hamda mehmondo‘stligidan chuqur taassurot olganini bildirdi.
Central Asia Tour – 2025 Pokistonning O‘zbekiston va Tojikistondagi elchixonalari hamda Pokiston turizmni rivojlantirish korporatsiyasi hamkorligida tashkil etilgan. Tashabbus mintaqaviy hamkorlikni rivojlantirish, xalqlar o‘rtasidagi do‘stlik rishtalarini mustahkamlash va turizm imkoniyatlarini keng targ‘ib etishga xizmat qilmoqda. Ralli qatnashchilari O‘zbekistonning boy madaniyati, tarixi va turizm salohiyati haqida turkum videomateriallar tayyorlashni rejalashtirgan.