Хитойда сув тошқинлари оқибатида 15 киши ҳалок бўлди
Хитойнинг Шаньси провинциясида 15 киши сув тошқинида ҳалок бўлди, яна уч киши бедарак йўқолган. Бу ҳақда Хитой ОАВ хабар бермоқда.
Кузги ёғингарчилик туфайли келиб чиққан сув тошқинидан 1,8 миллионга яқин одам зарар кўрди. 120 мингдан ортиқ фуқаро хавфсиз туманларга эвакуация қилинади. 37 мингдан ортиқ уй ва бинолар зарар кўрган ёки бутунлай вайрон бўлган. Табиий офатдан кўрилган тўғридан-тўғри иқтисодий зарар 770 миллион долларга баҳоланмоқда.
Қутқарувчилар бўлинмалари қум тўлдирилган қоплар ёрдамида соҳилларни мустаҳкамлашга уринмоқда. Аммо ёмғир тўхтамаётгани уларнинг ишини қийинлаштирмоқда.
Аввалроқ Туркиянинг шимоли-шарқидаги Ризо ва Артвин провинцияларида кучли ёмғир сув тошқинига сабаб бўлгани, АҚШнинг Теннесси штатидаги сув тошқинларида 20 дан зиёд киши, Афғонистонда сув тошқини оқибатида 150 киши ҳамда Покистонда кучли ёғингарчилик туфайли 18 киши ҳалок бўлгани ҳақида хабар берилганди.
Шарофат Маҳмудова
