Gamburg yer sudi rossiyalik tadbirkor Alisher Usmonovning Frankfurter Allgemeine Zeitung (FAZ) nashriga qarshi da’vosini qanoatlantirdi. Sud FAZ tomonidan e’lon qilingan bir qator bayonotlarni tuhmat deb topib, ularni tarqatishni taqiqladi. Bu haqda “RBK” nashriga Usmonovning matbuot xizmati va uning advokatlari ma’lum qilgan.
23-yanvar kuni e’lon qilingan sud qaroriga muvofiq, taqiqni buzganlik uchun har bir holat bo‘yicha 250 ming yevrogacha jarima belgilangan. Agar jarimani undirish imkoni bo‘lmasa, har bir holat uchun olti oygacha ma’muriy qamoq, umumiy hisobda esa ikki yilgacha ozodlikdan mahrum etish jazosi nazarda tutiladi.
Sud FAZ’ning Usmonov o‘z boyligini go‘yoki “Kreml manfaatlari yoki topshirig‘i asosida” ishlatgani, Rossiya hokimiyati manfaatlarini O‘zbekistonda norasmiy tarzda ifodalagani hamda 2006-yilda “Kommersant” gazetasi sotib olingach, uning tahririyat siyosatiga aralashgani haqidagi da’volarini asossiz deb topdi. Shuningdek, Aleksey Navalniyga oid, avval Rossiya sudlari tomonidan yolg‘on deb topilgan bayonotlarni tarqatish ham man etildi.
Usmonov manfaatlarini himoya qiluvchi advokat Yoaxim Shtaynxefel sud qarorini sharhlar ekan, FAZ materiallaridagi asosiy iddaolar “yolg‘on va obro‘sizlantirilgan narrativlar aralashmasi” ekanini ta’kidladi. Qayd etilishicha, sanksiyalar joriy etilganidan so‘ng Usmonov G‘arb OAVlariga qarshi bir nechta sud ishlarida g‘alaba qozongan, Germaniyada unga nisbatan ochilgan tergovlar esa 2024–2025-yillarda to‘xtatilgan.