Toshkent viloyatining Zangiota tumanida 3,5 tonnaga yaqin eshak va qoramol suyaklari saqlanayotgan yuk mashinasi aniqlandi.
Holat fuqarolarning murojaatlari asosida Toshkent viloyati karantin tadbirlarini taʼminlash guruhi, hududiy veterinariya xodimlari hamda profilaktika inspektorlari tomonidan o‘tkazilgan reyd chog‘ida fosh etilgan. Tekshiruv vaqtida yuk mashinasida qoplarga solingan katta miqdordagi suyaklar borligi aniqlangan.
Dastlabki maʼlumotlarga ko‘ra, suyaklar Qashqadaryo viloyatining Koson tumanidagi chiqindixonalardan yig‘ib keltirilgan. Ularni tashigan haydovchi suyaklarni pul evaziga olib kelganini tan olgan.
Biroq u hech qanday veterinariya hujjatini taqdim eta olmagan. Shu sababli suyaklar qayta ishlash sexiga topshirilib, sanitariya qoidalariga muvofiq yo‘q qilingan.
Hozirda holat yuzasidan Toshkent viloyati karantin tadbirlarini taʼminlash guruhi xodimlari tomonidan Maʼmuriy javobgarlik to‘g‘risidagi kodeksning tegishli moddalariga asosan maʼmuriy bayonnoma rasmiylashtirilgan.