АҚШ бош инфекционисти: “Коронавирусда ўлим ҳолати камайишининг ягона йўли — эмлаш”
АҚШ бош инфекционисти Энтони Фаучи коронавирусда ўлим ҳолати камайишининг ягона йўлини маълум қилди. Бу ҳақда у “CNN”га берган интервьюсида айтиб ўтган.
Фаучининг фикрича, бунинг ягона йўли – эмлаш. Келажакда қанчалик кўп америкалик эмланса, 1 миллионга яқин ўлим ҳолатининг олдини олиш мумкин. "Бизда барча имконият бор, бизда вакциналар бор. Улар юқори самарадорликка эга ҳамда хавфсиз", — деган эксперт.
Олимлар коронавирусга қарши курашнинг энг мақбул йўли эмланиш эканини бот-бот айтмоқда. Ҳозирга келиб бутун дунёда миллиардлаб доза вакцина қилинди. Хусусан, ўтган ҳафта Хитойда 1 миллиардан ортиқ киши тўлиқ эмланди. Шунингдек, АҚШда амалдорларнинг мажбурий эмланиши жорий қилинди, акс ҳолда улар лавозимидан айрилиши мумкин.
Буюк Британия ва АҚШда болалар ҳам вакцина олиши тартиби ишлаб чиқилди. Бунда асосан Pfizer/BioNTech вакциналаридан фойдаланилади.
Эслатиб ўтамиз, бундан аввал Францияда мажбурий эмланишга қарши шифокорлар намойиш ўтказгани хабар қилинган эди.
Жаҳонгир Қўзиев
