Маълум бўлишича, Хоразм вилояти Экология ва атроф-муҳитни муҳофаза қилиш бошқармаси Шовот туман инспекцияси ва туман ИИБ ходимлари билан ҳамкорликда Шовот туманида ўтказилган экологик рейд тадбирлари ўтказилган.

 

 

Тадбир давомида Шовот тумани «Бешчиқир» МФЙда яшовчи фуқаро А.Ортиқов тегишли ташкилотлардан рухсат олмасдан, ўзбошимчалик билан иморат қуриш мақсадида турлича катталикдаги 35 туп тут дарахтини ноқонуний равишда кесиб олгани аниқланган.

 

 

Қайд этилишича, аниқланган ҳолат юзасидан фуқаро А.О.га нисбатан Маъмурий жавобгарлик тўғрисидаги кодекснинг 79-моддаси 1-қисми (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) билан маъмурий баённома расмийлаштирилиб, базавий ҳисоблаш миқдорининг 5 баробари миқдорида жарима (1 350 000 миллион сўм) ва 47 миллион 520 минг сўм табиатга етказилган зарар ҳисобланди.

 

Эслатиб ўтамиз, қонунчиликда дарахтлар, буталарни, бошқа ўрмон ўсимликлари ва ниҳолларни ғайриқонуний равишда кесиш, шикастлантириш ёки йўқ қилиш учун жавобгарлик мавжуд. Бунда фуқароларга 2 миллион 450 минг сўмгача, мансабдор шахсларга эса 3 миллион 675 минг сўмгача жарима белгиланган.

 

Бундан ташқари, ким қонунни бузиб, давлат томонидан қўриқланаётган дарахтни кесадиган бўлса, ундан белгиланган жариманинг 20 баробари миқдоридаги тўлов ундирилади. Маъмурий жавобгарлик тўғрисидаги кодекснинг 162-моддасига мувофиқ (“Шаҳарлардаги дарахтларни шикастлантириш ёки уларни ўзбошимчалик билан кесиб ташлаш”) фуқароларга базавий ҳисоблаш миқдорининг беш бараваридан ўн бараваригача (максимум 2,2 миллион сўм ёки 220 АҚШ доллари), мансабдор шахсларга эса — ўн бараваридан йигирма бараваригача (максимум 4,4 миллион сўм ёки 440 АҚШ доллари) миқдорда жарима солишга сабаб бўлади.

 

Аввалроқ, дарахтларни кесишга мораторий 2024 йилга қадар узайтирилиши, Деновда 857 туп дарахт кесилгани ва ўсимлик дунёсига 329 миллион сўм зарар етказилгани, Бўстонлиқ туманидаги “Aмирсой” курорт зонасида 700 туп атрофидаги қимматбаҳо дарахтлар кесиб ташлангани, шу билан бирга дарахтнинг танаси эълон ёки реклама қоқиладиган жой эмаслиги ҳамда Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги томонидан жорий йилнинг ўтган даврида дарахтларга реклама ўрнатиш бўйича аниқланган 1 300 дан ортиқ ҳолатдаги рекламалар олиб ташлангани тўғрисида хабар берилганди.