Дарахтнинг танаси эълон ёки реклама қоқиладиган жой...ми?

 

 

Яқинда йўл четида энди кўкка бўй чўзаётган павлония дарахтига илинган оппоқ қоғозга кўзим тушди. Унга нима ёзилган экан, деб қизиқдим. Хаёлимга дастлаб дарахт ҳақида маълумот ёзилган бўлса керак, деган фикр келди. Бироқ... Не кўз билан кўрайки, ёшгина ниҳол танасига пойтахтимиздаги машҳур ўқув марказларидан бирининг эълони ёпиштирилган экан. Бу ҳам етмаганидек, эълонни ёш дарахт танасига “степлер” ёрдамида қоқиб кетишибди. Эълонда ёзилган рақамга қўнғироқ қилдим.

 

 

Телефонни кўтарган йигит (ўзини таништиришни истамади) эълон ҳақиқатдан ҳам  ўқув марказига тегишли эканини, лекин у реклама агентлиги томонидан тарқатилганини айтди. Қайси реклама агентлиги, деган саволимизга жавоб беришни истамади. Бироқ суҳбат давомида у “тилидан илинди”. Бу эълонларни тарқатиш учун ташкилот томонидан йўл харитаси белгилангани, рекламаларни тарқатиш учун талабалар (шартномасиз) ишга қабул қилинганини ошкор қилди.

 

Маълумот ўрнида, “Реклама тўғрисида”ги қонунга мувофиқ, ташқи рекламани моддий маданий мерос объектларида, йўл белгилари ва светофорлар, уларнинг тиргаклари ёки ҳаракатни тартибга солиб турувчи бошқа ҳар қандай қурилмаларда, шунингдек, дов-дарахтларни пайҳон қилиш ва туташ ҳудуддаги ободонлаштириш воситаларини бузиш йўли билан жойлаштириш тақиқланади.

 

Мадомики шундай экан, мутасадди идоралар бундай ҳолатларга қарши бот-бот чора-тадбилар кўришлари талаб этилади, акс ҳолда табиатга катта зарар етиши мумкин.

 

 

Муножат Валиева