Ўзбекистонга Раж Капур бюсти тақдим этилди
Ўзбекистон Президенти ташаббуси билан қайта тикланган ва Кинематография агентлиги томонидан ўтказилаётган “Ипак йўли дурдонаси” XIII Тошкент халқаро кинофестивалига Ҳиндистон делегацияси ташриф буюрди. Кеча пойтахтимиздаги Алишер Навоий номидаги киносаройда ҳинд меҳмонлари иштирокида махсус шоу концерт ташкил этилди.
Қайд этилишича, саҳнага Ҳиндистон делегациясида юртимизга ташриф буюрган Митҳун Чакраборти, Бомани Ирани, Кунал Капур, Наваб Шоҳ, Рандҳир Капур ва бошқа киноюлдузлар чиқиб, ўз таассуротларини ўртоқлашишди.
Ўзбекистон Кинематография агентлиги бош директори Фирдавс Абдухолиқов ҳамда ҳинд актёри Рандҳир Капур бошчилигида афсонавий ҳинд киноюлдузи Раж Капурнинг бюсти олиб чиқилди. Мазкур бюст Капурлар сулоласининг ўзбек халқига ҳурмати рамзи сифатида тақдим этилди.
Сўнг ўзбек ва ҳинд миллий куй-қўшиқлари билан рақслари ижро этилди. Айниқса, Митҳун Чакрабортининг рақси барчага манзур бўлди.
Таъкидланишича, ҳинд киноси нафақат Осиё, балки балки дунё киносаноатида ҳам алоҳида ўтин тутади. Ҳиндистон кино экспорти бўйича дунёда биринчи ўринда туради. Бу ерда бир йилда ўртача мингдан ортиқ фильмлар суратга олинади ва дунёнинг 90 дан ортиқ мамлакатларида намойиш этилади.
Тошкент халқаро кинофестивали доирасида ҳинд киноюлдузлари томонидан маҳорат дарслари, ижодий учрашув ва давра суҳбатлари ташкил этилади.
Эслатиб ўтамиз, кинофестиваль бош ҳомийси: AGMK, NGMK вa “O‘zbekneftgaz”.
Ҳамкор ҳомийлар: “O‘ZBEKTELEKOM”, “O‘zdonmahsulot” AK, “O‘zpromstroybank”ATB, “Ipoteka-bank” ATIB, “Asakabank”AJ, “O‘zbekiston temir yo‘llari”, “Hududgazta’minot”, “UzAuto Motors”AJ, “O‘zmetkombinat” AJ, “Milliy bank”AJ, “Farg’onaazot”AJ, “Eriell”, “Bosch” TM, “Easy Booking”.
Аввалроқ Ўзбекистон кинематография агентлиги Россия, Тожикистон, Қозоғистон давлатлари билан келишувга эришилгани, Турк ва ҳинд киноижодкорлари билан ижодий кеча ташкил этилгани, Стивен Сигал Тошкентга ташриф буюргани ҳамда туркиялик киноижодкор Эркан Колçак Кöстeндiл ҳам юртимизга келиши ҳақида хабар берилганди.
